今年只得二十六歲的facebook創辦人兼CEO朱克伯格（Mark Zuckerberg），身家多達六十九億美元（約五百三十八億港元），朱克伯格年少有為，實在是一眾IT界巴打的偶像外，亦是不少美少女的白馬王子。
不過呢個白馬王子，已有一個拍拖五年的亞洲女朋友Priscilla Chan，據知Priscilla Chan同朱克伯格一樣係哈佛大學學生，二人於○四年一個學校party上，齊齊等洗手間而相識，後來男方開口問女方有無興趣幫佢手搞facebook，目光遠大的Priscilla就一口應承，二人日久生情，○五年兩個人就撻出愛火花。
然而朱克伯格雖然榮升富豪，但他和女友恩愛非常，二人不時結伴出席派對和於facebook上大曬恩愛親熱照，Sweet到痺！
今年年頭，「陳小姐」（左一）跟埋朱克伯格（左二）去印度，出席facebook工程部印籍揸fit人嘅婚禮，成班人喺台上跳曬舞，「阿嫂」地位，無可代替。
外國長大嘅「陳小姐」，因用廣東話拼音Chan作姓氏，疑似港人後代。睇佢同愛人情深一吻，夠曬肉緊，各位姊妹，學嘢呀！
隨住facebook橫掃全球，呢對小情人亦成為狗仔隊焦點。呢家每次出街，「陳小姐」都攬到愛人實一實。啱嘅！「筍盤」嚟o架，梗要睇實。
無花無假！有個富貴男友嘅「陳小姐」，依然會落手落腳，攞埋蛋糕去party，無話要扮「上等人」。
陳小姐於哈佛讀生物學，○七年畢業又去加州嘅The Harker School做科學老師，一年後，重返加州大學三藩市分校讀醫，希望做兒科醫生，大概二○一二年就畢業，有愛心又有理想。
陳小姐將佢同朱克伯格去印度，著住傳統民族服飾嘅相放上facebook簡介，笑得好鬼sweet！講起短期教書工作，話要教導學生「how the world works」，好鬼有心！
