打到嚟
一個王維基搞到無綫陣腳大亂，如今連廣播界都風起雲湧，由大班鄭經翰投資及主理嘅香港數碼電台（DBC），本月已經喺數碼頻道上試播。
一向講嘢火爆嘅鄭大班，唔只用1億搞數碼電台，更不停高薪挖角及訓練新人，明顯追住商台打，誓報04年被俞琤炒魷之仇。上週五（14日），本刊獨家踩入大班數碼港的億元「大玩具」，65歲大班豪語：「唔似其他電台仲搵林氏兄弟扮後生做節目。」
親自監工
大班12月將正式開咪，「10點前特首」翻生，肯定有話題，而試播階段，他現在每日一有時間都會自己監督各節目運作及畀意見，而梁繼璋及李麗蕊亦大讚大班畀好多空間佢哋，唔會似港台縛手縛腳。
暗寸林氏兄弟扮後生
大班話有電台搵林氏兄弟扮後生仔做節目，明顯講緊44歲嘅林海峯同41歲嘅林曉峯。
電視要數碼化，電台亦掀數碼風暴，自從鄭經翰04年封咪後，大班用咗3年時間與各股東們投資1億及向各路招兵，係威係勢。本刊上週五（14日）獨家踩入位於數碼港的廣播基地，梁繼璋和李麗蕊即場開咪，大班則在旁監工，落場打仗睇到實。
人工重手
重金挑戰敵家電台，大班充滿信心：「我哋唔係針對其他台，因為大家市場都唔同，我哋唔係想打死佢（其他電台），冇進步嘅，佢哋係咪都死！我係想帶番起個行業，我哋sell高質靚聲，亦搵齊最資深嘅DJ，每個頻道都有各自style，好似有個叫『大曬台』嘅，會有真正80後嘅年輕人去做番年青節目，唔似其他電台仲搵林氏兄弟扮後生做節目！遲啲會喺直播時候有埋影像添。」老闆有信心，而在港台以《瘋Show快活人》起家，投靠大班後變身為《數碼快活人》的李麗蕊及梁繼璋，亦充滿信心：「大班畀我哋所有嘅待遇都好好，我哋開始唔夠1個月，我哋呢pair主持都覺得對方同自己做節目最夾，而且大班畀好多空間我哋，數碼廣播互動性較大，所以對數碼電台都好有信心。」開荒牛難做，不過老細有貨又唔怕捱喎！
講金又講心
雖然大班嘅DBC要喺12月先正式啟播，但其實家其七條頻道都開始試播階段，而除咗梁繼璋、李麗蕊、洪朝豐外，大班亦重金邀得以下DJ開咪。
梁思浩再風騷
11月中開咪將喺「大家台」做節目，但節目未定，同以前《瘋show快活人》相似。
陳海琪新天空
逢星期六、日9pm-12mn於「大戲台」主持《海琪的天空》，出山開咪有賣點！
顏聯武做台長
逢星期一至五於9pm-12mn喺「大戲台」主持《霎時衝動》兼任該台台長。
林子善搞捽碟
於「大曬台」中同徒弟DJ大軍，輪流捽碟及播歌做音樂節目。
唔使買機聽
雖然數碼收音機未算係完全普及化，但其實除咗喺各大電器鋪或報紙檔都有得賣呢類數碼收音機（$260至千多元不等）外，亦可以喺網絡上或喺iPhone apps上收聽，大班仲話遲啲全港嘅的士都會裝埋呢類收音機，等啲乘客都可以聽埋。
洪朝豐做青訓
大班電台王國解構
大班用億元打造嘅數碼電台王國，位於數碼港，佢話因為環境冇咁侷促，又夠大亦冇咁易受到外界騷擾。
從冇搵過阿蘇
盛傳因為阿蘇獅子開大口叫價太高，搞到開咪不成，就此一事問及大班，大班就澄清：「冇咁嘅事，因為根本就冇搵佢！」 ####
我哋sell高質靚聲 真實對白
好有信心 真實對白
網上聽直播在數碼電台的網址上，亦有連結可以收聽直播。
有免費app只要有smart- phone，就可以透過下載Apps聽到電台直播。
冇電腦人士如的士佬，遲啲都可以裝上數碼收音機同乘客一齊收聽高清電台。
出心出力本刊踩入大班電台時，撞啱洪朝豐開班教緊班80後DJ點開咪做節目，除咗佢哋，所有DBC嘅DJ都會上佢堂，上至開聲至播歌技巧都一一教曬佢哋。
教埋放鬆洪朝豐曾在堂上叫大家縮曬膊，原來係教大家按摩條頸令聲帶放鬆，而DJ學員事後仲猛讚話好work。
踩到半夜洪朝豐除咗要訓練DJ及睇佢哋做節目，自己亦會開咪做《洪朝豐時段》嘅嘢，所以呢排好多時都忙到半夜先走。
封咪12年洪朝豐稱喺香港已有12年冇開咪做節目，呢段時間喺溫哥華及廣州做節目，不過可以再次喺香港開咪，佢話係多得大班畀機會同信心佢。
主辦公室呢度係DJ們及製作部員工嘅主辦公室，佔地空間大，所以DJ們會出動超市車仔運CD去直播室，一啲都冇誇張。
節目製作室其中一間製作室係處理及提升節目嘅音效與音質，配套設施好齊備。
大班重地講嘢中氣十足嘅大班，連辦公室都不失霸氣，身後掛有佢喺10年曾蔭權頒發給佢嘅金紫荊星章嘅照片。
直播室DBC有7條頻道，貴為全港最多高清頻道嘅電台，淨係錄音室都有成十幾間。
230期《FACE 週刊》
