立法會剛移師新舞台，即上演一幕「雙煞鬥煲呔」火爆戲碼，毓民先撩者賤，煲呔罕有扯火還擊，最後曾鈺成與長毛都被拖落水，引發一場四角混戰，其後泛民議員出嚟幫拖，但表現好唔同，相當吊詭。知情政圈人士同小弟講，今次雙方過招，其實背後各有戰略盤算，而事件中最大輸家是公民黨。
該人士指，煲呔今次份施政報告拋出唔少好嘢，又推居屋又向窮人長者派糖，毓民亦知好難找到要害還擊，但區議會選舉逼近，「人民力量」派六十幾人馬出戰，如果搶不到議題，會十分蝕章，剛巧他當日排頭位發問，如果不演場好戲，豈不浪費大好機會？他憑著過往的「鬥爭經驗」，決定將槍口移離施政報告，轉為對準新上位的政務司司長林瑞麟，因為公眾對「林D9」印象不佳，容易挑起情緒。
此外，毓民向來知道煲呔易受激，只要用難聽說話密集挑釁，對方極可能沉不住氣，發火回敬，分分鐘講錯說話，他便有機可乘繼續食住上，場戲就更加好睇。所以他一開口就扯大喉嚨向煲呔喝問，更耍出他最擅長的「文字gag」，指煲呔委任D9做政務司長違反政治倫理是「亂倫」，以撩㷫對方。
知情人士還說，早一日長毛在議事堂放黑氣球搶盡鏡頭，圈內都知兩人已暗裏反目，而「人民力量」同社民連亦鬥到七彩，故毓民一定要搶回焦點，在「玩嘢大賽」中領先長毛，就算煲呔平心靜氣回答問題，他都不會收手。
毓民搶攻攞頭彩，的確令長毛蝕曬章。當日長毛本已帶齊「架生」（包括成袋雞蛋、番茄等道具），準備到他出場時，掟畀煲呔食，但毓民破壞了這橋段，令長毛無用武之地，最後只向曾鈺成張畫像丟個番茄算攞個尾彩。
長毛帶齊「架生」準備玩鋪勁，毓民上日被他搶去風頭，今鋪搶先攞返個頭彩。
講回煲呔那邊，他出席問答大會前，已知毓民班友必會再玩嘢，為了區選可能玩得更激，自己已到任期尾聲，再無所懼，既然如此，不如奮力反擊，大挫班友銳氣。煲呔最忍無可忍是的，毓民等「政壇爛仔」針對官員的言行暴力已不斷升級，不單止用粗言穢語辱罵，擲物更日日新鮮，由香蕉、苦瓜、膠樽、T恤到溪錢，可以話層出不窮，部分高官敢怒不敢言，揸到條頸燈芯咁，如果政府不還以顏色，日後班官就更加難做。
當日煲呔已準備子彈在膛準備開火，毓民狂吠一輪，終於去到「觸發點」，就是指對方「亂倫」，這句話有極大侮辱性（比強姦更嚴重），立即觸動煲呔的神經，於是猛烈開火射擊，更用上「爛仔」與「黑社會」等字眼，顯然意有所指，明眼人都知道他為何以此比喻針對毓民。
知情人士相信煲呔今次反擊亦考慮過公眾反應，政府高層一直睇住民意走向，知道大多數市民對班友所為十分反感，同泛民議員的看法有好大差別，強烈還拖非但不會失分，反而大快人心。
此外，官場內對煲呔痛斥政壇「爛仔」大都拍曬手掌，因為大家都忍氣忍咗好耐，過往只能good聲吞咗，今次煲呔敢於出拳回敬惡人，一眾官員都吐出一口烏氣！
事後林瑞麟致函立法會主席，要求嚴格執行立法會規則，維持會議秩序，在官員受粗暴對待時「採取適當行動」，意即不應只驅逐離場算數，如果涉及襲擊，應報警查辦。政府已找律師研究過，如議員的暴力行為危及官員人身安全，即使只引起驚慌，都可能觸犯刑事罪，班友唔好以為被趕出場就無事，分分鐘有手尾跟！
公民黨五名議員離場抗議，同毓民等「三煞」攬埋一齊，令溫和中產票加速流失。
