[忽然一周第845期]為可是她不是你 陳茵媺

2011年10月10日星期一

[忽然一周第845期]為可是她不是你　陳茵媺

[忽然一周第845期]留言集為可是她不是你陳茵媺

當城中的「黃金剩女」如莫文蔚、梁詠琪等，都紛紛要向外求愛，本地擇偶市場大概如歐洲經濟一樣，遭逢百年一遇的困局。
難得有筍盤應市（真要特別鳴謝廖碧兒！），那個還要叫陳豪，三十歲的陳茵媺，很難不教一眾姊妹又羨又妒。
「哈哈！他的確是個好好的男人！ So far，我現在認識的他，是一個 friendly的人，很會照顧人。」訪問當天，「雙陳」情定深井的溫馨照尚未曝光，但陳茵媺的笑，已經夠甜。
「我做女朋友都唔錯o架！比較會遷就人，無『公主病』。聽人說，我們給人的感覺很相似。」的確，二人一樣曾在外國唸書，喜愛咖啡。但要私有筍盤，真有這麼輕易？
「最初，是會有少少擔心同壓力，因為他之前的感情生活，傳媒都很關注，我不知怎做好。但做朋友的，就不會想太多！
「我的性格是，決定了一件事，便要做到底，遇強會愈強！」拿得起，捉得住。勇氣和自信，原是最顛倒眾生的胭脂。

悶人咖啡

對感情事，陳茵媺從來不願多說。「我這個人比較低調，鍾意工作還工作，私人生活還私人生活。當然，好開心觀眾關注我，而這件也是開心事（跟陳豪交往），但希望多留意我的工作就好了。」翻查資料，這個○六年香港小姐冠軍，不但緋聞極少，新聞也不多。以往最常被狗仔隊拍到的情景是，孤單逛街，現在換上甜蜜拍拖生活照。
「由讀書開始，每段感情都會維持一段比較長的時間，不會拍散拖。花花公子唔啱我，口花花都唔得，因為自己性格比較認真，有時太認真咗。
「一向鍾意叻的人，至少叻過我啦！比較傳統思想，始終覺得男仔要叻過女仔，要有 talent，個心要靚。而且，我是個有少少男仔性格的人，鍾意運動。所以，另一半最好都有『運動底』，懂得欣賞藝術，因為我喜歡所有美的東西。」
陳豪，視帝，四十歲，愛畫畫、打網球，還剛在馬來西亞開舖賣咖啡。表面條件，完美配合。只是，筆者年前訪問陳豪，他就謙稱非筍盤，還是個悶人。
「哈哈！我都覺得自己好悶o架！鍾意留在家，不是一個好 funny的人，所以大家相處無問題。其實做朋友不需要太刺激，最緊要可以溝通，我們有好多話題：運動、咖啡等等，他沖的咖啡好靚o架！仲好好飲！
「而且，他是個 nice guy，第一次合作拍《心戰》的時候，有好幾次都教我中文。是緣份吧！我想，搵男朋友，最緊要啱傾，錫自己，父母又鍾意，還要有感覺！感覺是一種 chemistry，好似拍劇一樣，是不能預計這個演員和那個演員走在一起，會不會有火花o架！」沒錯，看當事人和黃宗澤在《讀心神探》就沒有吻出愛火。「哈哈！大家喜歡的不同呀！」也幸而如此。

戀情隨著「深井家中溫馨照」正式曝光，「雙陳」名正言順以情侶檔接工作搵真銀，笑容與目標，同樣一致。

○九年，得到「飛躍進步女藝員獎」，在台上激動落淚，自爆還有多年合約，感激爹哋幫忙，盡顯真性情。

Daddy Girl

眼前人就是在說愛情，也要論及工作，可見是個獨立自主的揚眉女子。這該是幼承庭訓使然，陳父是工程師，陳母當會計，二人在美國結婚，移居加拿大後，誕下一女一子，家教甚嚴。
「小時候一放學便要返屋企，每個星期有好多活動，學溜冰、彈琴、數學，連中文都要學o架！但我都不知道老師說甚麼，而且一星期只學一次，只是照抄書，覺得好辛苦，直情學到喊！逃學？無得逃o架！媽咪揸車送我去，而且那些課程好貴，我唔敢偷走。
「每一日，媽咪仲會迫我至少用一個鐘練琴，她一邊煮餸一邊聽，只要彈錯幾個音，她立刻會話：『你彈錯咗呀？』其實，媽咪唔識彈琴，但就識聽喎！好叻！
「本來爹哋想我大學讀 business，或者其他 professional的科目，但由細到大，自己鍾意設計藝術，考到一間好好的設計學院（ Ontario College of Art& Design），媽咪亦知我有天份，所以最後爹哋都無反對自己讀 design。
「畢業後，主要做平面設計，最叻幫公司設計 image、 logo、制服等等，一手一腳做曬，好好玩！至於選港姐，細細個已經有諗，因為是一件盛事，好多 auntie又會叫我大個女記得去選！除了設計，演戲是我第二個興趣，唸書時也做過舞台劇。做港姐可以實現這個夢想，就決定返香港參選。
「屋企人都擔心我一個人留在香港，怕娛樂圈複雜。不過，有一次特別帶他們去看我拍《畢打自己人》，跟毛姐（毛舜筠）一班同事傾偈，爹哋就放心好多。
「我是 Daddy Girl，爹哋好錫我！開始拍劇之後，日日 email劇本給他，他會在電話逐句翻譯給我聽。因為沒真正學過中文，一些好簡單的字，對我來說，都好難。但現在認得很多中文字了！不用再寫拼音。不可以再半夜三時打給爹哋呢！他太辛苦了。」

○六年參選港姐時，父親特地由加拿大來港支持，最終奪冠。「十三歲時，已經希望爹哋會以我為榮，那天終於做到！」

小時候已愛美、懂擺甫士。「我很貪靚，一班 auntie常常說我的首飾和衣服都襯到絕。」

非常鬼妹

父愛偉大，難怪陳茵媺從前愛稱爹哋為「男朋友」。但亦「因父之名」，參選港姐時，有傳她是方逸華世姪女，因此機會特別多。
「如果真的有人俾機會，但我無勤力，做得不好，都無下次?！所以好開心大家見到自己的努力，知道我將劇本畫到花曬， make好多 note！假使不見了劇本，我會死?！大家一定幫手搵，又會大嗌：『茵媺，唔好走住，搵到嘞！』個個都知道我想做好件事，亦好著緊呢份工！」
一向相信，努力總會被看見。看來像「鬼妹仔」的她，雖然還是滿口英文，但談到即將播出的新劇《荃加福祿壽探案》、《法證先鋒 III》，會稱呼同劇的曹永廉為「廉哥」、黎耀祥是「祥哥」，比一眾土生土長的藝人還要知進退、懂世故。上位，從來就不會是平白無故的事。
「現在我好享受工作，經常在想怎樣用不同的聲線、表情，把每個角色做得好一點。視後？我當然想攞，但無得諗o架！惟有好好把握每一次機會。
「從前目標是環遊世界，有自己的品牌。現在做演員都可以去其他地方，已經好開心！結婚生仔？我都是女仔，都想o架！但不會給自己一個期限。哈哈！我是『八十後』，還有時間……」
「七十後」的陳生，還請等等。

《荃加福祿壽探案》
《荃加福祿壽探案》和《法證先鋒Ⅲ》相繼推出，人氣急升。劇中情人阮兆祥、蕭正楠，也對她讚不絕口，後者甚至承認有好感，陳生真要小心。

《法證先鋒Ⅲ》

飲嘢啫！

這一天，我好像說多了。「陳豪幾好呀！至少他玩夠了。」言者無心，聽者卻很難不在意。「是嗎？但他看來很乖呢。」「他說過，剛從澳洲回港時，差不多一星期蒲足七晚！」「哦……」
看陳茵媺笑笑口，若有所思，才猛然想起，眼前人生於加拿大，不諳中文。入行前，她幾乎不看，也看不懂香港的娛樂新聞和雜誌。
「唏！飲嘢啫。好正常。」還是身為男性的攝影師機靈，匆匆接上。
對啊。去蘭桂坊，不一定為溝女，可以傾偈，或是聽音樂？也不一定要劈酒，可以飲果汁，甚至咖啡也可以？
總之，飲嘢啫！陳生，我錯了。

九四年的電影《晚九朝五》，年輕男女的夜蒲故事，陳豪入行之作，他自言有其過去的影子。誠意推薦給陳茵媺！誰也有過去，愛他，了解他多一點。

撰文：李綺雯
攝影：袁家樂
協力：李梓軒
電腦效果：冼錦堂
髮型： Patrick So@ hh salon
化妝：江中平@ A& V Makeup School

第 845 期忽然1周

娛樂

大封面獨家開腔黎明秘密回港拆彈責樂基兒亂噏嘢
娛一叮伍詠薇幫前聰嫂出頭陳山聰嬲爆擘面
娛一叮加國提親成功王祖藍．李亞男共瞓一室
娛一叮股災衝擊娛圈陳豪馬明蝕入肉
娛一叮扮dry保5萬騷價高海寧暗交年半斷正
娛一叮王喜失勢被飛馬浚偉攝位冧陳總得米
娛一叮爆粗咒人死沙膽林敏驄惡搞主播
娛一叮男友嫌黐身嗌分手周秀娜師妹DaDa＊手自殘
媽咪姐手帳人生何處不是戲唐英年太太堅忍卅五年之路
媽咪姐手帳政界領袖坦白講
媽咪姐手帳台慶亮燈第二梯隊撐場
媽咪姐手帳蔡一智結婚周年 chok爆華麗明星
媽咪姐手帳林峯人肉布景
媽咪姐手帳楊怡呢期最惡
媽咪姐手帳甘比唔吼Chanel
媽咪姐手帳李丞責執爛菜
媽咪姐手帳倪震收電話做嘢
媽咪姐手帳楊秀惠撇周家蔚
媽咪姐手帳洪天明婚前試玩
媽咪姐手帳琴姐炳哥情未了
媽咪姐手帳黎姿有計
媽咪姐手帳高海寧輸條「罅」
媽咪姐手帳江欣燕頂硬上
媽咪姐手帳昆淩似女子摔角手
媽咪姐手帳袁艾菲「三露」餵宅男
媽咪姐手帳金剛女鬼馬朱唇
媽咪姐手帳你做初一我做十五
揞名爆「蟲美人」大陸有價有市
揞名爆「正武」小氣到暈
揞名爆「大羊」囂士乞人憎
句句金句句金
留言集為可是她不是你陳茵媺
外來語龍咁威2012
博出位微博結婚真人騷
名氣街靚太國慶鬥曬

影視資訊

峰So玄理農曆九月家居風水陣蘇民峰
電視有正嘢借《法證3》穀戲黎耀祥望3連霸
Movie特區頭輪好戲《翻兜有情郎》

星座

星宿啟示及早跟戀人溝通 Jackal

生肖

洛天紫微鼠不偏不倚

[忽然一周第845期]電視有正嘢借《法證 3》穀戲黎耀祥望 3連霸

精於法證推理嘅布國棟（黎耀祥），具豐富法醫知識嘅鍾學心（張可頤），再加上拼搏精神一流嘅執法人員李展風（吳卓羲），三執法部門精英聯手，利用科學揭破罪惡真相。
睇我咁強勢， 3連霸冇問題。（設計對白）
撐你！（設計對白）
攞硬！（設計對白）

無綫今年視帝之爭真係好激烈，大熱人馬除謝天華、鄭嘉穎外，另一大熱，就係台慶劇《法證先鋒 3》主角，亦係連獲兩年視帝寶座嘅黎耀祥。黎耀祥今次同上兩次完全唔同，柴九同劉醒係低下階層人物，而《法 3》角色係法醫官，一個高級專業人士，再加上同好戲之人張可頤飾演一對，絕對俾到觀眾一個新鮮感。祥仔更誇口話《法 3》絕對可以撼贏《潛行狙擊》。如此自信，且看佢今次能否如願，成為視帝三連霸嘞？
播映日期﹕ 10月 10日起周一至周五晚 9:30pm 翡翠及高清翡翠台

《法 3》開拍時，曾經出現過小風波。先係祥仔，佢接拍《法證先鋒 3》唔係冇壓力?，佢嘅壓力係來自 Bobby嘅 fans。有傳 Bobby喺拍《不速之約》時，因投訴林峯遲到而得罪咗樂小姐，因而被飛出《法 3》，無咗 Bobby呢個靈魂人物，劇集迫住要重新編製，連演員都幾乎換過曬咁滯。而 Bobby嘅 fans認為祥仔搶咗 Bobby個角色，曾喺網上發起罷睇《法 3》。
至於原本嘅女主角佘詩曼，則因手部受傷辭演，臨急搵張可頤頂上，而張因男主角係祥仔，加上第一次做法醫角色，亦唔介意執二攤。今次張可頤喺劇入面飾演高級法醫鍾學心，因為一連串離奇命案，將佢同法證部高級化驗師布國棟（黎耀祥飾）、重案組高級督察淩倩兒（徐子珊飾）及沙展李展風（吳卓羲飾）、科學鑑證主任蔣卓君（陳茵媺飾）及何正民（蕭正楠飾）聯繫起嚟。
呢班專業人員從鑑證、化驗、邏輯、心理、醫學及科學等唔同範疇，跨部門聯合破案緝兇。
《法 3》全劇有７至８個古仔，每個古仔都有唔同原因及唔同破案手法，跟《法 1》及《法 2》有啲唔同。

因為好奇心驅使，鍾學心常於公餘時間獨自追查兇案真相，因此經常令自己陷於危險境地。

布國棟同律師老婆周奕霏（胡定欣）本來好恩愛，可惜最後因價值觀分歧而離婚收場。

蔣卓君（陳茵媺）及何正民（蕭正楠）同為法證部同事。兩人由最初意見分歧到最後發展成情侶，可惜蔣卓君最後因公殉職。

督察淩倩兒（徐子珊）同沙展李展風揸車追賊後翻車，李展風困車底，倩兒手亦受傷。

《法證 3》有唔少驚險場面，呢個係講鍾學心俾綁匪捉走咗，布國棟為救人，冒住危險撲上匪徒車頂。睇見牙煙。

撰文：薑培綺

[忽然一周第845期]娛一叮伍詠薇幫前聰嫂出頭陳山聰嬲爆擘面

陳山聰與賭王千金何超雲拍拖後，奀星變紅人，以往掹車邊、黐實契姐伍詠薇出席活動的他，在 35歲生日（ 2日）當天，忽然致電炮轟伍詠薇，叫對方以後不要再找他。＊爆嘅伍姑娘隨即在微博宣布與陳山聰「永別了」，更問對方「良心好過嗎？」伍姑娘留言一出，陳敏之和楊怡等都紛紛力撐。

陳山聰和伍姑娘由最初契姐契弟相稱，到今日反面絕交，原來全因伍姑娘幫前聰嫂出頭所致。
本刊收到消息，伍姑娘一直不屑陳山聰為與千金拍拖，而棄前妻 Ponny，在「山雲戀」曝光初期，她更露口風指陳已結婚。據知，此事近日傳到陳山聰耳中，他即發難怒轟契姐多管閒事。
伍詠薇和陳山聰 04年拍《大唐雙龍傳》因投契而結緣，自此以契姐契弟相稱，更經常不避嫌繑住手出席活動。但自從「山雲戀」曝光後，以往有碗話碗的伍姑娘，對契弟拍拖一事卻罕有地沒有表態。原來兩人情誼於「山雲戀」前早已變質。

伍詠薇

周日（ 2日），一向烈女的伍姑娘於微博上載多段「割席」宣言，矛頭直指高攀上流社會的陳山聰。

陳敏之
跟伍姑娘情同姊妹的陳敏之，以往與陳山聰同樣以契兄妹相稱，但事件發生後，敏之即唔客氣直指有人眼中只得錢。

楊怡
微博一出，楊怡即挺身護友，好言安慰極度憤怒的伍姑娘。

向友人爆結婚

其實，自三月初爆出陳山聰力追何超雲，狠心拋棄拍拖十年的 40歲時裝設計師女友 Ponny Yeung後，陳山聰只承認與「女友」 Ponny分手。不久，有匿名信向傳媒告密，篤爆陳原來一直向外界隱瞞，他其實與 Ponny早於兩年前已結婚。
消息一出，棄糟糠的陳山聰形象直插穀底。據知，是其契姐伍詠薇向友人透露結婚一事。「陳山聰未同何超雲一齊前，伍姑娘有親飯局、 party，都會預埋山聰同 Ponny份，伍姑娘當正佢係親細佬。其實， Ponny都係山聰介紹俾伍姑娘識，不過兩個女人成日講 fashion，之後伍姑娘熟 Ponny仲多過山聰，所以佢哋嘅嘢伍姑娘知得最清楚。」知情人透露。
早於去年十二月，陳山聰向 Ponny提出離婚，伍姑娘曾力勸陳三思，但陳一意孤行。直至二月尾，盛傳陳追超雲，洞悉一切的伍姑娘，即代 Ponny出頭，質問陳山聰。但陳山聰卻向伍姑娘講大話，指自己與超雲只是普通朋友。雖則陳山聰向契姐誓神劈願與 Ponny離婚沒有第三者，但明知他擘大眼講大話的伍姑娘，睇唔過眼，向友人鬧爆陳山聰「惡行」。該友人翌日就寫了一封匿名信到各大報館，踢爆陳早已結婚一事。

[img][/img]
地底婚姻
陳山聰跟前妻 Ponny拍拖十年仍不肯賜對方陳太名份，據知與 Ponny同樣 friend底的伍姑娘，不值契弟拋妻所為，因此洩露兩人已婚消息。

呵護備至
昔日死口唔認妻，今日山聰則如廿四孝男友，侍奉超雲身邊。《蘋果日報》圖片

山聰無理眾舊友的唾罵，繼續於微博跟女友打情罵俏，超雲送他印有自己照片的心心蛋糕慶祝生日時，山聰即冧爆說：「我好喜歡。」

周日（ 2日）淩晨，陳山聰上載這張拎著生日氣球的照片後，隨即引爆他與契姐伍詠薇絕交。

出頭嗌高贍養費

伍姑娘曾表示因信得過陳山聰，曾表示，如果工作需要，絕不介意對方胸襲，可見兩人感情相當要好。《蘋果日報》圖片

直至「山雲戀」塵埃落定， Ponny與陳山聰開始傾贍養費問題。據知，陳應承 Ponny會在短期內一炮過給她二十五萬，另每月六千。原本 Ponny已答應，但數日後卻改變要求。「其實 Ponny一早對山聰死曬心，想盡快同佢搞清啲手續，所以山聰話幾多就幾多。不過伍姑娘同佢講，話廿五萬太便宜山聰，以山聰今時今日身價地位，最少要四十萬。」
四月初，陳山聰與何超雲秘密歐遊，但向前妻承諾所付的四十萬和每月六千的贍養費，遲遲未兌現，伍姑娘遂幫 Ponny搵相熟律師，打算向陳提出訴訟。越洋收到風的陳山聰，即時將所欠總數約五十萬的贍養費，一筆過付清給 Ponny。

好友割席

直至周日（ 2日）淩晨，陳山聰於微博上載拿著生日氣球的相片公布自己三十五歲生日，圈中好友紛紛留下祝福語句。與陳關係大不如前的伍姑娘，當晚亦有留言祝陳生日快樂。不過早前已得悉伍姑娘做金手指的陳山聰，見微博留言後，即致電怒轟伍姑娘，直斥她搞是搞非，更叫她唔好再搵自己。
遭陳鬧爆後，伍詠薇在微博留言寫道：「臨睡前，一友人打來叫我以後不要再找他，忿（憤）怒！我已跟他說永別了！太令人痛心了！你良心好過嗎？」而她更刪除了給山聰的生日祝福，以及不再「關注」對方。
伍姑娘留言一出，好友紛紛力撐，陳敏之同樣刪除對陳的生日祝福及不再「關注」他，更留言安慰伍姑娘：「有些人已被金錢衝昏了頭腦！……以後大家各走各路！」

走後門避記者
周三（ 5日），伍姑娘到電視城錄影《變身男女 chok chok chok》節目，面對在場記者追問與陳山聰絕交一事，伍姑娘再三表示「唔會再回應」，然後極速閃入錄影室後門。

chilam攬上身
伍姑娘相識滿天下，被契弟激到生蝦咁跳， chilam即識做，主動上載合照到微博，又攬上身自認是事件主角，曲線氹番好友。

[img][/img]
超雲在周二（ 4日）出席活動時開腔力撐男友，無意間踢爆男友正是伍姑娘所講的「友人」。《蘋果日報》圖片

陳敏之：佢好唔成熟

曾跟山聰友好的敏之，亦不值對方所為，她說：「我會祝福佢，但唔會主動聯絡。」

縱使伍姑娘一直冇開名指「友人」便是契弟陳山聰，不過在周二（ 4日），陳的 honey超雲在出席二手衫慈善活動時，便無意間踢爆男友與伍姑娘正式決裂。「呢件事男友知自己做緊乜。」問到可知兩人決裂？她說：「我知，但我唔了解詳情。」
同日，本刊致電伍姑娘，她在電話中嘆了口氣說：「呢件事我唔會再講啦，唔想越描越黑！（你向朋友爆陳山聰結婚？）唔……我唔回應！（你係咪叫 Ponny抬高贍養費？）呢件事，我亦唔會講任何嘢！」
至於身為陳、伍契妹的陳敏之，周二（ 4日）返電視城拍新劇《東西宮略》。對於二人擘面，敏之堅持會同契姐同一陣線。「做朋友係緣份，啱就一齊唔啱咪唔做。喺呢一刻，我淨係知道家姐（伍詠薇）唔開心。對於陳山聰，我唔明點解佢會咁做，我覺得佢好唔成熟同好小朋友。（希望有一日和好？）唔諗呢啲咯。依家都搞成咁，其實佢同人拍拖之後，我哋都冇再見過。呢一刻我只想家姐開心啲。」記者致電陳山聰，但至截稿前仍未有回覆。

撰文：娛樂組
攝影：攝影組

[忽然一周第845期]娛一叮加國提親成功王祖藍．李亞男共瞓一室

泊時鐘酒店
王祖藍帶李亞男去附近一間時鐘酒店，唔好誤會佢哋去幫襯，只係祖藍泊咗架車喺時鐘酒店停車場啫！

早前王祖藍事先張揚會與女友李亞男同遊美加一個月，此行更會向女友父母正式提親。出發前非常興奮的祖藍，上周五（ 9月 30日）與李亞男低調返港後突然封嘴，被問及提親一事，祖藍竟大耍太極說：「我依家同陳豪掉轉咗身份，佢高調，我要低調。」突然玩低調，唔通有景轟？
據知呢趟美加之旅，二人先與王君馨等圈中教友去做佈道會及四圍遊玩，至 9月中才撇低大隊到溫哥華探李亞男父母。祖藍入住李家一星期，終打破拍拖兩年來的禁慾戒條，與女友共處一室溫馨共枕。祖藍今次除了狂食西餐之外，唔通仲食埋禁果？
王祖藍與李亞男（ Leanne）自去年公開戀情後，一直都表現大方，雖然身高相差六吋，仍無阻二人感情發展。上月兩人齊飛加國見家長，距離王祖藍娶得美人歸又跨進一大步。

我哋第一次同牀咋！（設計對白）

趕去接女
周日（ 2日），王祖藍下午到將軍澳出席完新劇《荃加福祿壽探案》活動，急急腳揸車走，原來係去佐敦接李亞男。佢仲驚落雨拎定把遮防身，認真細心。

體貼拖篋
王祖藍去佐敦一間教會接李亞男，離開時仲幫女友拖篋。呢日佢著咗對駌鴦色波鞋，再加上高佢 6吋嘅李亞男，行到邊都俾人眼望望。

各自返歸
啱啱先去完美加朝夕相對一個月，王祖藍與李亞男返港後依然黐纏。呢日管接送見面唔夠一粒鐘，祖藍就要送女友返將軍澳寓所，自己再返回西貢。冇藉口再同屋共枕，真係慘。

緊張見家長

李亞男起程前曾向本刊承認會帶祖藍見家長，更表示「無樓我都嫁佢」。上機前祖藍被問到會否與同行 8位教友一齊去見家長時，他說：「係o架，咁咪冇咁驚囉！」當時李亞男又搭嘴話：「我屋企都夠大o架！」女友開到聲，祖藍擺明車馬留宿李家。
據知祖藍和李亞男到溫哥華前一晚，李亞男已打定電話返屋企，請李媽媽準備晚餐，為男友見家長做足準備。祖藍亦曾向友人表示「好緊張」，一向對衣著不太講究的他更詢問友人應如何打扮自己，可見祖藍對見家長一事甚為重視。

試未來嶽母手勢

「除咗王君馨，全部教友都有去溫哥華一星期，不過祖藍喺 9月 14日就撇低咗大隊，跟 Leanne返屋企見家長，仲入住李家。有兩日下晝祖藍約教友出嚟見面，夜晚都係返 Leanne屋企。都啱嘅，難得放大假去溫哥華，花多啲時間同未來嶽父嶽母相處係件好事。雖然佢哋話婚前唔會有性行為，但之前喺美國都係住同一間酒店房，去到 Leanne屋企當然都係啦！」
9月 14日，祖藍和李亞男到埗溫哥華，即與友人兵分兩路，向李家出發。知情人士說：「本來祖藍想請 Leanne一家出去食飯當見面禮，但 Leanne話喺屋企見面好啲，咁大家可以慢慢食冇咁拘謹，加上佢好想祖藍可以試嚇佢媽咪嘅手勢。」向來多嘢講的祖藍，當晚可能太緊張，未有大放笑彈，不過表現大方有禮，還對未來嶽母承諾會好好對李亞男，請她不要擔心。雖然李亞男父母一直希望女兒嫁個條件好的男人，但與祖藍接觸後，對這位未來女婿另眼相看。

冧掂未來嶽父嶽母
去加國見家長前，李亞男曾向男友提水母親要求頗高。今次王祖藍表現誠懇，獲女友父母認同。未來嶽父嶽母（圖）更帶祖藍四出觀光，當正佢係一家人。

原來李亞男一家在溫哥華亦有捧祖藍場，每逢有他演出的電視劇與節目，他們都一齊睇。李媽媽更大讚祖藍扮女人夠鬼馬，唔知剛播出的《荃加福祿壽探案》，溫哥華有得睇未呢？

禮金慢慢傾

Leanne和母親向來感情要好，年多沒見，兩母女有兩晚差不多傾通宵，其間當然有提到祖藍。「 Leanne媽咪話，雖然祖藍唔算咩專業人士，又唔係大有錢佬，不過佢知祖藍好上進，又見到個女拍拖好開心同幸福，所以都好接受祖藍。不過李媽媽話唔使太急結婚，可以慢慢籌備，下年尾結婚都未遲。」與李家相處一星期， 9月 20日離開溫哥華時，祖藍更獲李母邀請聖誕節再去溫哥華一齊過節兼傾談婚禮細節。雖然今次見家長祖藍未有詳談婚期，更未有提及禮金數目，不過未來嶽父嶽母呢關總算成功過咗啦！

忽然轉低調

上周五（ 9月 30日），叉足電返港的王祖藍即開工努力搵老婆本，翌日已到澳門出席活動。對足一個月突然分開唔習慣，周日（ 2日）祖藍在將軍澳出席完新劇活動後，即揸車到佐敦接李亞男，更毫不避忌將座駕停泊在一間時鐘酒店樓下的停車場，接完女友之後，再送她返回其將軍澳寓所，自己則返西貢屋企。
周一（ 3日），記者向祖藍問到有關美加之旅，初時他滔滔不絕講在美國睇了十套舞台劇，更獲好友帶挈入後台觀摩。不過一提到去溫哥華見家長，即封嘴說：「呢啲嘢唔講，我依家同陳豪掉轉咗身份，佢高調，我要低調。（見家長順利嗎？）唔講！（你哋瞓埋一張牀？）都話咗我依家好低調，私人嘢咩都唔講！」記者再致電李亞男，但她已飛去北海道拍旅遊特輯而未能回應。
由公開戀情開始，祖藍每提起「性」，總會斬釘截鐵話自己意志好強，更會靠神的幫助令事情唔會發生，如今轉曬口風，真係想低調，還是根本已經守唔住呢？

亞男貞節戒指失效
影過唔少結婚硬照嘅李亞男，早前一句「冇樓都嫁」！擺明一切以愛行先，結婚分分鐘唔使大搞。

李亞男手上戴住祖藍送嘅貞節戒指恐怕已失效，睇嚟換隻結婚戒指啱啲喎！

祖藍玩低調
本周一（ 3日），王祖藍出席無綫亮燈儀式，對於與李亞男在加國遊破禁，他不斷重複要低調處理感情事，仲玩手指迴避問題。

美加遊變連體嬰

由 8月 31日開始的美加之旅，王祖藍與李亞男對足一個月。雖然旅途大部分時間都有大班教會好友同行，但兩人每次影相都黐到實，愈來愈似兩夫妻。

LA環球片場

探喬宏太太小金子

紐約佈道會

撰文：娛樂組
攝影：攝影組

[忽然一周第845期]娛一叮股災衝擊娛圈陳豪馬明蝕入肉

我呢鑊甘喇！（設計對白）

港股近日出現插水式急瀉，恒指四天內已累跌近二千點，情況比 08年的金融海嘯更險峻。香港地全民皆股，這慘況亦衝擊娛圈，令眾藝人人心惶惶。情場得意的陳豪輸得最甘，單是一隻滙控（ 0005）已令他帳面唔見一半。馬國明亦手持十幾萬蟹貨，翻身無望。專家和玄學家更預測港股後市乏力，恒指隨時見萬二點，低處未算低，唔驚就假。

[img][/img]
《蘋果日報》圖片

周二（ 4日），原本已急趺的港股在下午又突然大瀉，收市恒指創 29個月新低。

陳豪四年未見岸

因為一個內幕消息，令陳豪在 08年金融海嘯前，將部分血汗錢，以當時市價 130元購入滙豐控股（ 0005），「我呢啲全部辛苦錢嚟o架！我怕輸俾通脹，諗住買隻大藍籌穩陣，點知結果咁大鑊。」五號仔股價四年來一直反覆， 09年試過跌至 33元，雖然之後曾上試百一蚊，但這趟股災又令滙控再次疲弱。本周二（ 4日）以 56.65元收市，陳豪表示揸足四年都未見岸，陰功。「我其實都係穩陣派，依家我都係睇定啲先。不過我一日唔賣仲有翻身之日。我寧願攞錢去買樓，信磚頭多過股票。」不如諗諗與陳茵媺買愛巢，更加實際啦。

滙豐（ 0005）
買入價：$130
4/10收市價：$56.65
持股量：約 1萬 5千股
帳面蝕：約 110萬

馬國明蝕多過九成

一直在 TVB默默耕耘的馬國明，因誤信朋友而中招，他說：「股票唔係好熟悉，但有次個朋友話呢隻股一定掂，就買咗十幾萬，點知坐曬艇。」起初馬國明不願重提傷痛，但為了提醒大家切勿誤信消息股，他才透露自己手持非凡中國（ 8032），「我高峰時候 4蚊買，依家跌到 1毫子都唔夠，沽又唔係，惟有擺住先囉，做大閘蟹都冇辦法啦。」他更被反覆的股市嚇到止步，「唔會啦，依家都已經好傷，以後唔會再買股票。」

非凡中國（ 8032）
買入價：$4
4/10收市價：$0.074
持股量： 4萬股
帳面蝕：約 15萬 7千

陳展鵬轉炒日股

陳展鵬現時還回味 07年逢股必升的蜜月期，他說：「記得 07年最有斬獲，嗰時最興抽新股，抽乜就升乜，嗰時期好輕易賺取到 6位數字。」輸錢皆因贏錢起，現時他還持有幾隻銀行股，「有少量交行（ 3328），帳面蝕幾萬，不過暫時唔會沽出，望佢回升。」他揚言以後轉炒日股，港股少掂為妙，「我對日本股票比較有興趣，見佢哋人民團結，天災後復元得快，對日本股票好有信心。」乜你識日文咩？

交通銀行（ 3328）
買入價：$6.5
4/10收市價：$4.17
持股量：約 2萬股
帳面蝕：約 5萬

陳奐仁小注怡情

[img][/img]

陳奐仁不擅長投資，現時只持有兩手中國移動（ 941），「我 110蚊買入，今日跌到幾多我都唔知，朋友話只要一間公司咁耐都未執，就總有一日會升番，唔會擔心。」雖然蝕得唔多，但他也絕不趁低吸納，費事一頸血，他說：「唔會再買股票，我都係聽相士話努力工作，唔再賭博，腳踏實地好啲。」

中國移動（ 941）
買入價：$110
4/10收市價：$73.9
持股量： 1千股
帳面蝕：約 3萬 7千

專家教路羅家聰：個市一直向下

[img][/img]

港股變幻莫測，早前還在牛熊兩派爭持階段，但經過連日來不停見紅，明顯熊市已定。記者問過交通銀行首席經濟及策略師羅家聰，他說：「個市仲會一直向下，即使中間會有些少反彈，但整體嚟講都係跌。睇明年中至年尾先至有大跌市，因為經濟蕭條嘅幾樣因素都未出齊，單係樓價仲未跌，呢幾個月恆指仲會下試萬三點。」
羅提議市民應該趁反彈即沽貨，「如果想撈底依家未係最抵買，個市到明年底會跌到近萬一點附近，反而我勸手上有貨嘅人唔好再坐，趁反彈時執番些少本，無謂再浪費時間啦！」

Bosco法拉趁低入

這場股災風高浪急，令不少藝人一鋪清袋。不過有危才有機，未有貨的黃宗澤、陳法拉和朱慧敏，都紛紛表示趁低吸納，睇好港股後市出現小陽春，甚至見底反彈。

黃宗澤 set定買入價

唔買就蝕！（設計對白）

近期股市大跌，很多人都在採取觀望態度，但黃宗澤（ Bosco）卻鬱手掃貨，他說：「我會趁低吸納。會買中銀香港（ 2388）先啦！其實之前我喺價錢好低時，大約 13蚊用六位數字買入嘅，即使而家跌到咁殘（截至 10月 4日，收市價為$14.52），我仲係有賺。」他揚言已作好部署，更 set定買入價，「我會等到中銀跌到 12.8或者 12.9時，可能會再入少少貨。」

貼士：買金融相關股
陳法拉吼實力股

無貨一身輕的陳法拉唱反調，表示愈跌愈好，她說：「成個市跌咪好囉！因為好多本身有實力嘅股票，都跟住個市跌，我覺得有危至有機！我會分階段逐少逐少入貨。」
她更吼實一些俾大市拖累的優質股，「入乜嘢？咪入實力股囉！你唔好問我入邊隻啦！平時想入呢啲股一定好貴，依家入真係又平又抵啦。」記者再三追問，法拉仍然不肯透露心水，有錢齊齊賺吖嘛！

貼士：分段入藍籌

朱慧敏睇埋市盈率

雖有台灣 IT男友做靠山，但朱慧敏對投資十分進取，而且她懂逢高必沽，所以今次股災沒令她損手爛腳，她說：「我資產平均分配為地產、股票及流動現金。呢排股票不斷跌，好彩我 6月時放曬所有股票，現時準備趁低掃平貨。」不過她並非亂入市，事前一定參考不同數據，「新地（ 0016）、建行（ 939）都唔錯，我睇過佢嘅 PE（市盈率）都 OK，而且近日啲股東都不斷增持，絕對入得過。」

貼士：入市前做功課

玄學預測

[img][/img]
《壹週刊》圖片

港股不停尋底，玄學家麥玲玲和李丞責亦預言來年市況更加波動，投資者切勿輕舉妄動。

李丞責：年底見萬三

今年香港股市會喺十月見底，十二月出現小陽春。如果想有斬獲，十月趁低吸納，兩個月後放，會係一個幾好嘅短炒投資機會。到咗十二月底至出年農曆年，股市會再下挫，跌到萬三點。因為美國每逢蛇年都唔好， 13年係蛇年，會帶動全球經濟轉差，要守到 14、 15年先有好轉。

[img][/img]
《壹週刊》圖片

麥玲玲：只適宜短炒

其實喺下半年，由於太多不明朗因素，投資者係適宜短炒。今年十月到十二月初，股市暗湧特別多，會有突發性逆轉，年底至出年初先開始回穩。不過踏入明年，市況危機重重，明年五月至六月期間更不適宜投資，明年底更有「刑剋」，係全年最波動嘅月份。

撰文、採訪：娛樂組
攝影：攝影組

[忽然一周第845期]娛一叮扮 dry保 5萬騷價高海寧暗交年半斷正

車場並肩
到達圓方停車場，高海寧戴曬鴨嘴帽和黑超，放心與男友並肩而行，而同樣以街坊裝打扮的 Andy，則邊行邊說笑，甚享受拍拖生活。

自從前咪神徐淑敏嫁人生女退下火線後，後浪高海寧、呂慧儀隨即攝位彈出，成為新一代 TVB賣「胸」孖寶。
為縛死一班宅男，早前公司一聲令下，要一班性感小花將戀情低調處理，感情生活愈 dry，騷價自然愈高。為免觸怒公司趕走客戶，高海寧即使已跟旅行社太子爺男友丘至剛（ Andy）暗交年半，發展至半同居關係，仍繼續做大話妹死口唔認。
貴為 TVB最賺錢咪神，性感冇底線的高海寧，出道至今一直深受客戶歡迎，騷價已由新人價五千，急升至近日的 3萬元，泳衣騷更達 5萬，身價實屬新紮小花之冠。

現時高海寧出席普通一個商場騷都收 3萬，至於泳衣騷更至少收 5萬。長做長有，難怪她一直對外堅稱 dry爆冇仔。《蘋果日報》圖片

早前高海寧和陳庭欣在《為食總司令》中著比堅尼泥浴，旋即成為長期宅男討論區的榜首圖片。在現時無綫正值青黃不接兼挖角潮之際，高海寧自然能成功攝位。

鬼祟嘆壽司

有麵包就要放棄愛情，曾被斷正到旅行社太子爺男友 Andy寓所見家長的高 Ling，早前於活動中就自爆甩拖：「我家陣冇男朋友，係 available（單身）。會唔會搵番個就隨緣啦，最緊要有工開，搵錢緊要。」她這邊廂高調發表單身宣言，另一邊廂其實仍繼續瘟仔。
兩周前（ 9月 17日）約下午三時，久未外出拍拖的高 Ling及 Andy，難得同日休假。她以一身 cap帽、墨鏡兼披肩包到上頸的裝束，從旺角寓所離開，由男友揸車接載，直駛到尖沙嘴圓方逛街。抵達停車場後，兩人即前後腳步行到商場的壽司店開餐，更選擇於一暗角位坐下。嘆足一粒鐘魚生後， Andy先行步出食店，尾隨的高 Ling即四周張望，似乎懷疑有記者在場，她更與男友急步到停車場取車，隨即踩油速閃。

同車冧爆
9月 17日下午，男友 Andy專登到高海寧位於旺角的寓所，做柴可夫駕著女友的白色寶馬 118i座駕，一同到尖沙嘴圓方 shopping。一見到男友，高 Ling即時笑到四萬咁口，冧爆！

避忌彈開
兩人在壽司店醫肚完畢，途經較多途人的商場樓層，明顯提高了警覺性，離開十幾呎咁行，尾隨的高 Ling更全程頭耷耷。

轉車速閃
之後兩人發現記者， Andy遂轉行程，送女友返回旺角娘家後，再取回自己的平治房車，直駛深井寓所。

早前有指高海寧的繼父在女人街賣假貨被捕，事後高 Ling慨嘆自己養唔起頭家，又激動澄清：「佢係我親生爸爸，唔知點解會變繼父！」還表示一定會努力賺錢買樓養家。《 Face》圖片

撻著年半
其實早在去年 4月，本刊已率先拍得高海寧與 Andy拍拖。當時二人先在旺角勝利道茶餐廳食消夜，其後更在男方車廂內激情攬啜（右圖），事後高辯稱：「因為落雨搭順風車，佢喺車教我用 iPhone。」堅稱兩人只是普通朋友關係。

撞破速逃

Andy原本駛向自己所住的深井寓所方向，惟至荃灣附近，發現有採訪車尾隨，被撞破好事的他們隨即掉頭，並加速駛回旺角的高 Ling娘家。 Andy為避嫌，更專登取回自己長泊於附近停車場的黑色平治房車，一支公返回其深井寓所。當日二人難得的約會，無奈要提早結束。
高 Ling男友唔見得光，據知全因 TVB下了聖旨，要她拍拖盡量低調。知情者透露：「高 Ling一個禮拜至少返 Andy屋企瞓兩、三晚，其實同同居冇咩分別，不過佢之前俾人影到拍拖，公司即刻搵佢照肺。所以家陣佢出入深井已經好小心，一定唔會自己揸車，只會搭的士再轉 Van仔，更唔會收工直接返去。」

回應口震

本刊曾拍下高海寧包到冚到 Andy位於深井海韻花園寓所，據知現時她亦不時上門留宿，過半同居生活。

對於被斷正違旨瘟仔兼半同居，高 Ling於周一（ 3日）出席台慶亮燈時，緊張回應。

記：我哋影到你同男友拍拖喎，點解仲自稱單身？
高：我冇拍拖，我哋係普通朋友。
記：呢個男仔影過好多次，咁都係普通朋友？
高：（開始口震）朋友唔係男就女，其實我成日同好多人出街，唔同異性都有，只係你哋 focus咗同一個人度。
記：有人見到你經常喺深井出入，係咪同居？
高：（擘大口嘆了一啖氣）冇可能，我晚晚都會返旺角屋企。
記：係咪公司俾壓力，驚影響出騷價，出街都要包到冚？
高：唔關事嘅，我都有自己正常社交生活。（之後她就借故走開，表示不願回應。）
拍拖猶如偷情，為了麵包著想，兩小口惟有打死唔認，繼續大話連篇。

旅行社太子爺

高海寧的男友丘至剛（ Andy）， 30出頭，身高 6呎 3吋， 98年在香港培正中學畢業，其後到加拿大「 York University」攻讀數學系。畢業返港不久，隨即在父親所開設、有 18年歷史的「東南西北旅遊有限公司」工作，一心承繼家族生意。
Andy幾乎每天都要在旅行社坐鎮，在私人辦公室內主要負責處理文件，以及管理職員為顧客預訂機票及代辦機票等旅遊服務，間中 Andy更會走出舖面幫手。據知現時 Andy佔公司股份 3成，其餘 7成則歸於其父丘沛民。

Andy為人踏實，幾乎每日都會返回旅行社坐鎮，有時幫手聽顧客電話，反而其父甚少露面，似乎已放心交生意俾個仔打骰。

該旅行社在旺角商場開業已十多年，屬小型旅行社，主要負責代辦機票、自由行套票等。

身高六呎三的 Andy，是籃球隊 FCCM成員之一，曾經上場參與不少比賽，去年出戰康文盃，更打入三甲。

撰文：娛樂組
攝影：攝影組

[忽然一周第845期]娛一叮王喜失勢被飛馬浚偉攝位冧陳總得米

本來續約不樂觀，又開腔鬧樂小姐偏心的馬仔，因為冧掂陳總，突然有 say，難怪亮燈當日心情靚爆滿場飛。

去年陳志雲涉貪以來，「迷雲黨」雞飛狗走，就連陳總愛將馬浚偉亦劃清界線︰「我份合約係 TVB，所以只能夠講係 TVB黨。」只剩下王喜為陳總「遮風擋雨」，不離不棄愛到底。
9月 2日，陳總獲判無罪，王喜以為守得雲開，可惜效忠 16年的他，即使在挖角潮下，最終卻要成為公司棄將。王喜被 out，反觀騎牆派的馬浚偉忽然由佛教改奉基督教，更陪陳總返教會，攝位成功再次得寵。冧得掂高層，馬仔終於有運行，成為明年力捧小生。

王喜多次同陳總進出法庭，忠心不二，可惜仍未能扭轉他被 out的命運，難怪他在微博大吐苦水。

有陳總撐腰，早前滿腹牢騷嗌解約的馬仔，近日轉口風︰「依家要再深入一步傾！」國慶日更在微博透露「好消息千萬，心情大好！」意氣風發。
兩個月前馬仔主演的《紫禁驚雷》，收視最高 40點，拍得住謝天華的《潛行狙擊》，馬仔見勢好，即放風話快將約滿。其實去年陳總出事後，馬仔曾棄暗投明暗中轉冧樂易玲，知情者透露︰「嗰陣陳總情況唔明朗，馬仔成日都去搵樂小姐，尤其見記者前，都會問下樂小姐意見，仲不時 sms對方噓寒問暖。樂小姐見馬仔係 TVB親生仔，都落力將佢推介俾監製。」
陳總復職後，雖然遭律政司上訴，但在公司卻重掌權力。馬仔即翻冧陳總，仲話咁快攝到位，成為陳總身邊紅人。昔日在陳總身邊的王喜卻即時被打入冷宮。「馬仔為冧陳總，不但陪佢返教會，又成日打俾對方約食飯，陳總好睇馬仔，不但喺相熟傳媒面前為馬仔講好話，希望出嚟嘅報道正面。同馬仔傾續約時，條件亦好優厚。馬仔要求 TVB來年為佢度身訂做劇集同飲食節目，誓要爭視帝及主持獎，初步都傾掂數。陳總又話幫佢搭路搵唱片公司，圓佢歌手夢。」

勢成水火

有人撐腰，馬仔更意氣風發。據知，他最近因為未能參演梁材遠監製的《造王者》，鬧得天翻地覆。知情者話︰「馬仔走去問珍姐點解《造王者》冇佢份，仲燒埋樂小姐嗰疊，好話對方同佢接咗梅小青部《當旺爸爸》，等佢演唔到《造王者》喎！兩人仲因為咁面左左。」
10月 3日，無綫亮燈儀式，馬仔不但排位勝去年，更難禁意氣風發滿場飛。問他續約傾成點？他笑曬話︰「兩星期後應該會知， 8號先完廠，要再深一步去傾先。（係咪同 TVB傾掂數，明年幫你度身訂做個好角色？）未係！（你有冇宗教信仰？） 3年前信咗基督教，但未受洗，唔拜神?嘞，就連拍劇儀式都唔上香。（有冇返教會呀？）有。（有讀者見到你同陳志雲一齊返教會喎？） No！唔會囉！（王喜最近喺微博酸溜溜？）冇乜留意。」
得寵的馬仔當旺，被打落冷宮的王喜，惟有日日在微博及上 now節目《 102觀星總部》發牢騷，又在微博上載「愚忠」、「被迫害」宣言。真箇有人歡喜有人愁！本刊連日致電王喜，但他的電話長期轉駁到留言信箱。

早前《造王者》已在無綫進行開鏡，劇情與《宮心計》類同，馬仔一向是梁材遠監製禦用小生，如今角色落在祥仔（左）手，難怪他恨得牙癢癢。

忙於拍攝《當旺爸爸》的馬浚偉（圖），之前曾因無綫幫他推掉大陸劇嘈曬，最後無綫都讓步，下月讓他返大陸拍《建國風雲》。

排位勝舊年

馬仔有陳總撐腰，今年台慶亮燈的排位比去年（右圖）好，同力捧的黎耀祥及林峯企最前排的中間位。至於盛傳辭職的樂易玲，亦獲無綫副行政主席梁乃鵬力撐：「陳志雲係好多部門嘅總經理，我今日想講清楚，藝員部係樂易玲管理嘅，樂小姐唔會走。」

去年排位

不和到出面

馬仔與樂易玲傳不和，當記者要求兩人合照時，馬仔即拉埋珍姐攝中間。

一影完合照，馬仔即扯住珍姐，避開樂易玲。

翌日有報紙刊登馬仔拒絕與樂易玲合照一事，他即在微博多番解釋，又話珍姐推佢入廠拍劇，明顯此地無銀。

變臉絕技

被陳總放棄的王喜，未獲無綫續約，反而騎牆馬成功攝位，兩人連日來在微博發功，一個報憂、一個報喜！

馬浚偉風騷

21/8 狂吐苦水
意興闌珊的馬仔，自爆唔想再玩，暗示自己不續約。

01/10 自爆好消息
連月來發牢騷嘅馬仔，國慶日突然自爆心情靚，是因為陳總幫他揮到好的續約條件。

04/10 效忠娘家
連日鬧爆的馬仔，突然在微博大擦 TVB鞋，又話對娘家效忠，口風突轉。

王喜愁爆

05/9 心灰意冷
心知不能續約的王喜，為自己未能留低自圓其說，愁爆！

29/9 自責愚忠
一段自責愚忠的留言，令人聯想王喜與陳志雲不和。

30/9 爆被逼害
王喜在微博大吐苦水，指有人利用他來上位。

撰文：娛樂組
攝影：攝影組

[忽然一周第845期]媽咪姐手帳台慶亮燈第二梯隊撐場

今年
反觀今年，少咗佘詩曼、鄧萃雯一線花旦，加上謝天華、陳豪、鄭嘉穎及阿姐出埠做嘢，明顯比舊年單薄好多。

無綫於本周一（ 3號）舉行邁向 45周年台慶（要避開 44唔老黎數字）亮燈儀式。面臨三間新免費電視台衝擊，藝員陣容比舊年略為遜色，除三部台慶劇《荃加福祿壽探案》、《法證先鋒３》同《萬凰之王》嘅演員穿著戲服出席外，就只有林峯、陳法拉、馬浚偉等第二梯隊上陣撐場。
不過講到受注視程度，唔係班藝員，反而係幾個高層嘅舉動。好似一直被傳不和嘅陳志雲同李寶安不時咬耳仔扮老友，樂易玲亦同曾勵珍 friend到拖曬手影合照。人人交足戲，比企定定嘅演員仲好戲。

舊年
43周年台慶亮燈，全台一線小生花旦幾乎到齊，過百藝人迫爆錄影廠，場面熱鬧。

高層好戲派
亮燈儀式後，重掌大權嘅陳志雲負責推六叔邵逸夫嘅坐椅返觀眾席，而樂易玲則拖住六嬸方逸華，眾人均笑容滿面。

之前喺法庭煮死陳志雲嘅李寶安，當日同陳志雲經常細聲講大聲笑，老友鬼鬼。演技同視帝黎耀祥有得揮。

[忽然一周第845期]媽咪姐手帳林峯人肉布景

Chok完一晚，國慶再 chok過。當晚林父好積極介紹阿仔林峯俾世叔伯識。林峯呢個 chok笑維持咗成晚咁滯。

林峯近日喺大陸為新片《白蛇傳說》宣傳，仲開始拍《楊家將》，戲中佢又要打又要騎馬，真係忙到有氣冇碇唞。不過出名孝順嘅佢一有空閒，都盡量抽時間陪老竇去飯局，真係抵讚！
上周六（十．一國慶），福建社團聯會就喺會展搞咗個就職晚宴，唔少政商界名人都有出席，媽咪姐梗係去湊嚇熱鬧。點知入到會場，櫈都未坐暖，媽咪姐就離遠見到林峯。原來 chok王老竇林華國係福建社團聯會嘅常務會董，今次林父帶子上陣，除咗慶祝國慶，最重要係同班鄉親父老聯嚇誼。就當晚所見，林峯忙到爆，一時同世叔伯打招呼，一時同人影合照，十足十人肉布景板。難得佢好識做，全程冇托手踭，好專業咁 chok足全場。

微微 chok
林峯當晚被嘉賓「輪照」，但佢貫徹 chok王本色，一時 chok笑，一時托眼鏡擺出 chok樣，相當合作。

托住 chok

喺國慶晚宴前一日（ 9月 30日），林峯 chok樣拖實堂妹林夏薇、徐子珊出席錶行活動。

chok到攰
不過 chok得多傷氣力，林峯最終 chok到扁曬嘴。

[忽然一周第845期]媽咪姐手帳楊怡呢期最惡

我係一姐，我大曬！（設計對白）
可惜佢見好唔識收，掟完又掟唔願停手，搞到其他演員連個波都未掂過，企戙戙做布景板。

近排媽咪姐睇《不速之約》睇上癮，上周六劇集喺商場搞宣傳活動，不過 chok王要出席國慶晚宴嚟唔到，全場觀眾即時噓爆。冇咗男主角啫，好在仲有女主角楊怡撐場。
當日楊怡一改低調作風，風騷滿場飛，當正活動係佢嘅個唱一樣。玩遊戲時佢仲霸氣盡現，除咗霸實中間有利位置，其後嘅掟波波環節，更由頭掟到尾，其他演員都只係有得睇冇得玩。查實楊怡呢排咁積極，無非都係想話俾人知佢坐硬一姐之位。家嚇阿佘走咗，胡冏又不成氣候，呢期佢最惡啦！

遊戲開始時，二線花旦馬賽原本企中間，點知阿姐楊怡一個身位攝入，馬賽即時靠邊站。

楊怡攞住波波猛咁掟，初時大家都係咁笑。

[忽然一周第845期]媽咪姐手帳楊秀惠撇周家蔚

點知一發現記者影相，楊秀惠就速撇周家蔚。定啲嚟，唔係捉姦！

「大難臨頭各自飛」呢句說話本來係用嚟形容一對夫妻，但原來一對「好姊妹」都用得著！好似楊秀惠同周家蔚，最近因為一齊拍古裝劇《造王者》，早幾日趁唔使開工，孖咇 shopping，喺尖沙嘴買護膚品。
女人買起嘢上嚟，真係唔係人咁品！左試右試，搞咗兩粒鐘都唔願走，俾完錢，兩個女人同售貨員仲傾唔停，你一句我一句，不知幾咁有默契。但當發現記者影相，楊秀惠竟然開行 turbo急步走，撇低 shopping戰友，搞到周家蔚要喘曬氣追上去。後來去到 coffee shop，楊秀惠又腳印印，等周去買埋嘢飲，成個公主咁等人服侍，呢啲咪叫「好姊妹」囉！

二人在《造王者》都唔係乜嘢大角色，唔知點解楊秀惠會嫌棄周家蔚囉！

買護膚品，坐低慢慢揀，分享意見。

買完，繼續邊行邊傾，孖公仔咁。

楊秀惠坐住玩電話，等飲咖啡，好嘆！

周家蔚抵得諗，買埋咖啡做跑腿，嫁得出，梗有原因！

[忽然一周第845期]媽咪姐手帳洪天明婚前試玩

湯盈盈含住忌廉啜爆洪天明，好 high！

洪天明及周家蔚近日宣布婚期再度有變，原本打算喺 11月 11日嘅「光棍日」於澳洲行禮，依家推遲到年尾喺香港簽字擺酒搞掂。
話時話，呢對未婚夫妻公認玩得，近日網上就流傳咗幾張佢哋各自玩攬啜嘅相：洪天明同差唔多時間生日嘅湯盈盈夾埋慶祝，玩到又攬又啜；而周家蔚就同班女仔 friend夜蒲，情到濃時玩啜嘴。兩個人唔單止外形襯，連行為性格都一樣咁 open，真係天生一對嘞！

玩嚇啫！（設計對白）

錫完嘴，再錫面，但同性嚟啫！未來老公點會嬲。

[忽然一周第845期]媽咪姐手帳琴姐炳哥情未了

兩人終於可以坐低，老友相聚，自不然話題多多，兩人傾到忘形，好似唔記得身邊有個朋友咁噃。

年屆七十九高齡嘅琴姐李香琴自上年拍完《公主嫁到》之後，就唔再拍劇，因為拍劇工時長，對老人家嚟講的確吃力。
上星期，嘆緊世界嘅琴姐，應無綫之邀返娘家拍個人特輯，兩個鐘就收得工，輕輕鬆鬆，何樂而不為。當日琴姐一拍完嘢，第一時間約依家喺無綫做配音嘅舊緋聞男友炳哥譚炳文嘆茶敍舊。呢對「舊情人」一見面就用鄉下話傾到雞啄唔斷，由近況到家庭瑣事係咁傾，似有傾唔完嘅話題。兩人傾足幾粒鐘，琴姐先打道回府。

炳哥一早坐定喺餐廳等琴姐，呢個老友認真唔話得。

琴姐嚟到都未坐定，炳哥即陪住佢同啲舊同事打招呼。

琴姐要走啦，老朋友炳哥（前）更親自送琴姐離開。

琴姐同炳哥自今年 1月出席過《香港演藝人協會十七周年晚會暨演藝人 2010傑出表現獎頒獎禮》後，到依家成 10個月先再見，難怪會咁長氣，傾極唔完啦。

[忽然一周第845期]媽咪姐手帳高海寧輸條「罅」

唉，今次真係蝕條罅o架！（設計對白）
贏就贏條罅（設計對白）
高海寧不單冇波又冇罅，更可以用平平無奇嚟形容；反觀楊秀惠「雙峰」欲出，搶曬「峰」頭。

無綫「性感女神」高海寧同楊秀惠於 1號（周六）喺銅鑼灣為明珠台新劇《雷霆戰海》宣傳造勢，兩個有料之人當然要性感鬥一番啦，點知錯曬！
話說當日高海寧雖然以白色長袖低胸衫上陣，但以全身配搭嚟睇，冇「峰」頭不特止，連搵條罅睇嚇都冇，似足中環返工嘅 OL。反觀楊秀惠，以超低胸全黑連身褲出戰，成副「戰鬥格」。論性感度，高 ling呢個「性感女神」今次完全輸曬。

當日楊秀惠除咗俾記者圍之外，外欄仲有大班龍友舉機係咁影。

相反高 ling就得幾個印印、賓賓影相。呢啲就係有「罅」同冇「罅」嘅分別啦。

記招日除高 ling同楊秀惠外，出席嘅仲有敖嘉年（右二）及黎諾懿（左二）。

冇「波」、冇「罅」，即係冇嘢睇咯。

[忽然一周第845期]媽咪姐手帳江欣燕頂硬上

嘴都歪
搞咗一大輪總算坐定，不過睇見江欣燕坐到對腳打曬交叉，就知佢坐得好辛苦。

新劇《荃加福祿壽探案》２號（周日）喺東港城搞宣傳，有王祖藍、阮兆祥、李思捷同苟雲慧、陳茵媺、官恩娜及江欣燕。為撐套劇，一班搞笑組合梗係異能上身玩到盡啦。不過講到最搏命嘅，非中女江欣燕莫屬啦。
話說活動上其中一個環節，要搵女角擺一個煙視媚行嘅甫士，成班女仔冇人肯制，江欣燕只好頂硬上。原來擺呢個甫士難度甚高，結果搞到身穿旗袍嘅佢，坐低時，連絲襪頭都露埋出嚟。

夾硬嚟
H欣欣條裙好窄呀，要工作人員幫手先坐得低。

走曬光
可惜愈幫愈忙，欣欣顧得前顧唔到後，搞到絲襪頭同半邊籮都走埋出嚟。

當日除阿姐汪明荃有嘢做嚟唔到外，其餘一眾主角都到齊。

唔好以為中女唔掂，玩起上嚟放過班後生o架。

[忽然一周第845期]媽咪姐手帳黎姿有計

已為兩女之母嘅黎姿，身形愈來愈弗，比 7月孖女生日宴時更美艷纖瘦，老公馬廷強（左一）真係有福氣。

做咗幸福少奶奶嘅黎姿，上周六國慶日（ 1日）喺半島酒店 7樓花園套房包場，搞四十歲生日 party睇煙花。圈中唔少老友好似蒙嘉慧、伍詠薇等都嚟賀壽。
啱啱 7月至同孖女（家蔚同家鎂）開一歲生日會嘅黎姿，汲取咗上次經驗，為免一對孖女及細佬黎嬰成為傳媒焦點，今次預先劃好攝影區，安排好保鑣駐守，事前又公告天下，講到明會喺前門出入，俾傳媒影相。據知當日四點半左右，黎姿大搖大擺喺正門出現，企定定俾大家影靚相之際，孖女同黎嬰已經暗度陳倉，由酒店嘅秘道入內，避開曬所有傳媒視線，黎姿呢招聲東擊西，掂！

圈中好友伍詠薇及蒙嘉慧特來到賀，伍姑娘熱情繑住男友人，而老公練海棠則吻賀壽星女。

據知黎嬰的康復進度理想，有時仲會返美容中心 Cosmax打點一切，但黎姿始終唔想細佬被傳媒影相，所以由秘道運黎嬰出入。

7月的生日會，黎姿一對孖女家蔚及家鎂成為傳媒焦點，為免今次再被傳媒追住影，今次酒店特別安排了秘道讓她們進出。

[忽然一周第845期]揞名爆「蟲美人」大陸有價有市
2011年10月07日

早排同班行家茶敍，其中有個跑祖國線嘅行家爆料，話近呢十幾年嚟，祖國經濟起飛，造就咗一班大款。呢班暴發戶有錢就身痕，鍾意搵女藝人「陪」嚇。為咗擺闊同貪新鮮，「香江菜」變成搶手貨。當然有啲女藝人心態係搵錢至上，唔理北上或南下，只要有「客」就去。反觀電視台一姐「蟲美人」就「矜貴」得多咯。
「蟲美人」識得吊高嚟賣，所以條件多多。佢揀客首要係地方，總之要北京先有交易，其他省市免問。至於陪客費，冇折冇扣，實收 80萬人仔一晚。雖然係咁，依然有價有市、唔憂做。聽講有啲豪客更出到包機管接管送。「蟲美人」呢個一姐真唔係白叫。
咁又係嘅，單睇今次電視台挖角潮，「蟲美人」成為頭號目標人物，就知佢幾有辦法啦。

[忽然一周第845期]揞名爆「正武」小氣到暈
2011年10月07日

媽咪姐聽個二五講，話音樂人「正武」雖然係男人，但性格比女人更女人，小氣、記仇乜都齊，所以同佢傾偈時，真係要好小心，唔知邊句說話會得罪佢！
「就講『大笑姑婆』，一直以嚟都係『正武』幫佢寫歌，所以兩個好鬼 friend。不過你知『大笑姑婆』一向口沒遮攔啦，幾年前，因為一句說話激嬲咗『正武』。估唔到佢咁多年嚟仲未消氣呀。之後更轉軚同『大笑姑婆』個死敵『早仔』 friend o架。
「講真，『大笑姑婆』份人真係冇乜嘢，結婚都有請『正武』，可惜呢個小氣鬼寧願去日本旅行都唔騷人之嘛。其實『臣嫂』曾經幫佢哋 line up過，不過『正武』硬頸唔聽之餘，後尾仲寫咗隻〈最壞朋友〉俾『臣哥』，入面內容就係講『大笑姑婆』o架。」
唉，「正武」，你係男人嚟o架，大方啲啦。

[忽然一周第845期]揞名爆「大羊」囂士乞人憎
2011年10月07日

早兩日，媽咪姐同個空姐朋友 H喺中環明星竇 high tea，咁啱見到常客「大羊」同老公「孖口」都喺度。 H一見到「大羊」即刻藐爆話﹕「呢個人愈嚟愈乞人憎。」乜事咁＊？
H話「大羊」早排單拖飛北京，當時有搭客正將行李放上 head locker，可能阻到佢，佢竟然用粗口鬧人喎。喂，頭等艙條通道咁闊，兩個人並排行都得，況且人哋最多都係阻你一陣啫，唔使用粗口鬧人呀？咁仲未算，仲捉住個空姐鬧人點做嘢o架。
坐定冇耐，佢又攞張簽帳無限額嘅「黑卡」出嚟買免稅品攞彩，空姐同佢講張卡碌唔到，問佢有冇第二張？「大羊」即時發曬爛渣，話部碌卡機有問題，嘈完一輪，卒之都係冇買到嘢。真係瘀到爆。
唉，媽咪姐睇佢平時出嚟身光頸靚，原來係悍婦一名，怪唔之得「孖口」都忌佢三分啦。

[忽然一周第845期]句句金
2011年10月07日

梁詠琪（ GiGi）、莫文蔚（ Karen）及郭羨妮近日閃婚，引起圈中熱話，一班好友同行唔單止連番恭喜，仲借題發揮大發偉論。一眾女星下嫁嘅唔係老外就係老內（國內），完全冇本地貨。難怪祖兒要一眾港男好好反省，並許下願望：
希望嫁個香港好男人。
祖兒支持本地創作，抵讚！不過香港好男人少之又少，更要同香港其他剩女爭，就算天後貼埋大牀都未必 sure win o架。

潮流興閃婚，但郭富城就表明唔會效法，仲開玩笑：
近排忙，要閃瞓！
瞓，日後大把有得你瞓。但婚呢，唔係成日有得結。佢唔心急啫，都體諒嚇熊黛林心急吖。

已有一子嘅陳慧琳（ Kelly）指 GiGi、 Karen靚女高?，必生靚靚混血 B女，他日長大仲可以做囝囝女友，
我蝦餃仔發達喇！
嘩， Kelly咁快對定親家？不過好嘢係要 mark實嘅，但兩個 B女同時 mark曬，似乎大貪咗啲喎。不如留番一個益嚇媽咪姐啲孫仔啦。

許廷鏗疑似與同性好友互啜而爆出斷背情，好友張敬軒雖無辜捲入風波，但不忘取笑許廷鏗：
佢哋睇牙咋？
順便睇埋耳鼻喉？
軒仔呢個理由都幾好笑喎，不過許廷鏗自己係牙醫，係都佢睇人牙，唔係俾人睇牙嗰個啦！

王喜早前接受 now訪問，揭露被 TVB苛待真相，表示喺受辱過程同時學會謙卑，並鼓勵大家：
被侮辱嘅機會唔好放過佢！
媽咪姐亦真心勸佢唔好咁執著。由上個月到今個月，佢都唔知鬧咗 TVB幾多次。如果學識謙卑，唔爭在學埋放下。

楊怡早前出席活動罕有性感，被記者取笑「都有條線」，難得楊怡唔介意：
我隻手都多線。
再多線都冇用啦！楊怡手中線，又點及身上事業線。香港地，好現實嘅。

[忽然一周第845期]星宿啟示及早跟戀人溝通
2011年10月07日

巨蟹座 22.6-22.7
近來跟戀人溝通的次數減少，習以為常會令你錯以為問題不大，長此下去感情更有轉淡的危機。愛侶的心事最難明，應盡早跟對方溝通。本周工作會遇上以常規手段無法解決的難題，動動腦筋發揮創意可令你順利渡過難關。朋友因一時衝動起哄會令你一同失去理智，保持冷靜會令你看清別人忽略的事情。

白羊座 21.3-20.4
事業平穩中見停滯，令你興起轉工的念頭。此念頭雖然吸引，但作任何重大的決定前，應三思而後行，而此刻並非最合適的時刻，應靜待適當的機會才行動。

金牛座 21.4-20.5
真愛難求，更應該好好珍惜有情人。本周宜盡情享受蜜運，花點心思給愛人製造一個難忘的浪漫回憶。能者多勞令你壓力倍增，宜找機會放鬆自己。

雙子座 21.5-21.6
與戀人事先商量好的事情，實行起來對方卻沒有好好配合。應多體諒對方，不宜抱怨。誤會易結不易解，放開胸懷反能減少煩惱。遇上表現自己的機會時，應全力以赴。

獅子座 23.7-22.8
事業進展順利，但獨力只能有小成就，相反群策群力、多跟別人合作，反會令你的事業更上一層樓。長輩某些建議雖不合時宜，但仍要保持表面的尊重。

處女座 23.8-22.9
愛侶對你的種種限制，其出發點是為你好，多於是真的約束。其實兩人相戀，本難有自由身，只要把對方的限制視為一種福份，就會覺得被綁也是種快樂。

天平座 23.9-22.10
事業上，面對著難以捉摸的上司，會令你近期感覺無所適從。既然上司心意難測，倒不如做好自己的本份，凡事求心安，自然就不會有危機。

天蠍座 23.10-22.11
理財上，時而手緊，時而手鬆，本屬平常不過之事。只要遵守理財原則，以節制為首要任務，就不用擔心被突如其來的事件所影響，打亂自己的理財計劃。

人馬座 23.11-21.12
在你不知情的情況下，一些工作上的重要決定已交由別人來落實。但請收起被視為局外人的不滿情緒，把心思再度專注於工作上，會對你的處境較為有利。

山羊座 22.12-19.1
跟戀人發生小摩擦後，請冷靜再回想一遍大家相處的時光，會發現開心事仍然較苦惱事為多。其實好與壞、苦與樂，全由主觀因素所決定，一時之氣並不能作準。

水瓶座 20.1-19.2
跟戀人說出真相無疑是一種冒險，但本周卻無可避免。與其把秘密藏於心內成為包袱，倒不如盡早說出來，反覺自在。近期會容易追回被拖欠的金錢。

雙魚座 20.2-20.3
因為要還清工作上欠下的人情債，導致近期壓力增加。雖然感到無奈，但實屬必要。正確表達意見的同時，圓滑的技巧同樣重要，會讓戀人真心接受你的意見。

作者 profile
Jackal原是廟街最紅占蔔師，現於旺角開設占蔔店。本身對各種占星術都有相當研究，尤擅於以占星術結合星座作愛情、人緣、財運、人生大事的預測。（預約占蔔電話： 6280 5880）
(Jackal)

[忽然一周第845期]洛天紫微
2011年10月07日

鼠不偏不倚
本周繼續積極主動。凡事採中庸之道，自然有收穫。留意身邊小人，別信讒言。有利日子 10、 12號。

牛別得罪人
愈想有表現，愈覺被綁手綁腳，做事應分先後次序，尤應注意人際關係。不利日子 9、 13號。

虎多?伴侶
伴侶欲給你意外驚喜，你卻因粗心而無動於衷。注意跟伴侶多溝通，及培養生活情趣。有利日子 10、 12號。

兔克服恐懼
應爽快時需爽快，若畏首畏尾會失先機。能克服心理障礙，自然會有收穫。有利日子 7、 11號。

龍要多忍耐
小心跟客戶和上司的相處，因他們本周將很難服侍。做好份內事，不宜開拓新客戶。不利日子 8、 12號。

蛇小心謹慎
本周容易粗心，所以做事須謹慎。上司特別著緊你的表現，是時候做好些以博取賞識。有利日子 9、 13號。

馬加倍努力
被阻滯纏住，所以應盡量減少無謂應酬，專注工作。獨力苦幹，才有成果。有利日子 10、 12號。

羊拋開成見
遇挫折時，朋友、同事會是助力，但你卻嫌對方愛認叻。放下自尊，便能接受對方。不利日子 7、 12號。

猴主動出擊
工作富有挑戰性，利主動出擊，尤利娛樂、公關、廣告、傳媒、化妝、飲食等行業。有利日子 8、 12號。

雞親力親為
凡事多著緊些，才會有收穫。因本周容易粗心懶散，令志在必得的事情臨門撻 Q。有利日子 9、 13號。

狗腳踏實地
本周特別容易眼高手低，不切實際；亦特別多無厘頭阻滯，令你無法應付而氣結。不利日子 8、 10號。

豬切忌急進
人緣佳，但不宜有新搞作。做事應有條理，忌急進。可跟大客安排洽談機會以增進默契。有利日子 7、 11號。

作者 profile
何洛天師傅師承香港及國內多位玄學大師，對風水、紫微、八字命理、蔔卦、奇門、六壬等素有心得。現為壹玄堂命理顧問。
撰文：馮淑玲
資料：何洛天師傅（ 6096 1687）

2011年10月10日 星期一