王晶幫TVB拍金裝劇攻內地 恥笑王維基
幫TVB拍金裝劇攻內地 王晶恥笑:否認打仗惡鬥魔童 佢有牌至講啦
大導演王晶在影視壇身經百戰，故獲無綫重金禮聘回巢拍攝金裝豪華劇增加「軍力」！新劇精挑細選多料影後葉德嫻（Deanie）拍當紅小生馬國明及內地紅爆的劉愷威，務求攻陷中、港兩地市場，滴水不漏！對於幫無綫打仗撼香港電視網絡（前名城市電訊）王維基的說法，晶哥不認同，甚至帶點恥笑說：「咁講太抬舉佢，佢喺電視界做過乜嘢？」在晶哥眼中，王維基只是不懂投資的傻仔！以晶哥今時今日的地位，難怪唔放「魔童」在眼內！
場地提供：金不換泰國菜館
王晶的金裝豪華劇預計拍攝35至40集，由TVB戲劇製作總監曾勵珍負責，因要配合內地市場，要重口味，故要選用部份內地演員。早已敲定由晶哥親密戰友葉德嫻（Deanie）配新一代晶女郎童菲合演母女，至於飾演Deanie姐3個兒子的主角人選，除內地走紅的劉愷威外，還有冷手執個熱煎堆的馬國明。「其實晶哥係屬意搵黃宗澤，因為佢喺內地受歡迎，但Bosco拍緊內地劇《少年神探狄仁傑》，加上男神馬國明夠乖夠聽話，從來唔會揀劇本拍，而且形象又好，TVB有心力捧馬國明上位，所以藝員科二話不說就交咗馬國明畀晶哥。晶哥對呢個演出配搭都幾滿意，應該可以搶到收視。」知情者說。
19歲便加入電視行業的晶哥分析說：「以前嘅TVB劇好勁，因為世界各地都有得播，喺外地叫好，先至係真正好，淨係網民發聲冇用，依家內地根本唔多人睇無綫劇集。家陣香港拍劇賺唔到錢，拍到好似《小寶與康熙》咁先有用，所以今次會用呢個做大方向。」
不屑魔童為啖氣
今次晶哥由新老闆陳國強親自請來為娘家開劇迎戰王維基，晶哥不放王維基在眼內，不屑道：「TVB受威脅？佢（王維基）有牌至講啦，乜咁抬舉佢呀？佢只係電視圈一個新血，新傻仔，佢喺電視界做過乜嘢？佢唔做賺錢嘅電訊生意轉而投資做唔賺錢嘅生意，就喺為咗喺亞視敗走嗰啖氣？我就計唔掂條數喇，以做生意角度絕對係傻，王維基出售城市電訊套現50億，最多玩得4年，但依家都過咗一年！」
我打從由75年入TVB經歷過5至6次挖角潮，包括佳視同亞視，邊個拉親人都會輸甩褲，冇一個成功例子，咁做除咗畀到幕後新丁拼摶上位，拉走嘅得益者，其實都係做到滑曬牙，王維基與其向TVB台前幕後挖角，倒不如自己培訓人才，好似亞視咁，當年有啲節目《百萬富翁》、《今日睇真Ｄ》都好好，好多次打低TVB，但要長期作戰！」
亞視與魔童的恩怨情仇
2008年12月
魔童出任亞視行政總裁，上任十二天後疑發生「被辭職」事件，有指魔童接見亞姐袁小曼，問其胸部真偽 ：「你個波係咪假？」惹非議。
2012年11月
亞視執行董事盛品儒舉行記者會，指王維基在亞視出任行政總裁期間，大量複印並盜取公司敏感資料，偷走亞視機密，盛聲稱如沒有這些資料王無力在離開亞視後約一年申請免費電視牌照。同月王維基入稟高院，控告亞視和盛品儒誹謗。
2013年2月
有「牙齒印」的盛品儒和王維基出席港台團拜活動，王維基更慘食盛品儒檸檬被拒合照。
.王晶幫TVB拍金裝劇攻內地 恥笑王維基
http://veryy8.blogspot.com/2013/03/tvb-tvb_2.html.王晶幫TVB拍金裝劇攻內地 恥笑王維基
http://veryy8.blogspot.com/2013/03/tvb-tvb_2.html
