媽咪姐
官司押後判 陳志雲有番笑容
2012年11月09日
商台 CEO陳志雲近年官司纏身！佢之前出任無綫電視業務總經理期間，同前助手叢培崑齊齊涉嫌貪汙，上年 9月佢哋被區域法院判無罪兼得堂費，但話咁快，律政司隨即提出上訴。所以，周二（ 6日）同周三（ 7日）又喺法庭見到志雲大師嘞！
媽咪姐要幫大家攞第一手消息，梗去聽審。過程真係峰迴路轉呀！原本律政署外聘嘅資深大律師郭棟明喺周二（ 6日）聆訊嗰時，要求上訴庭定罪同判刑，態度強硬。但周三（ 7日）代表陳志雲嘅辯方律師謝華淵引用唔少案例，話上訴庭唔可以定罪，亦唔可以指引下級法院（如區域法院）判罪，因為咁樣會剝奪被告嘅上訴權利。所以，佢重申即使上訴庭唔認同原審法官嘅判決，都唔可以直接定陳志雲同叢培崑嘅罪，只可以發還區域法院重審咁話。
最後控方代表郭大律師都同意咗呢個觀點，而上訴庭法官就話需要時間考慮，押後裁決。嗱，初步咁睇，辯方律師至少令志雲大師唔使即時被判刑，似乎形勢唔錯喎！難怪審訊後，陳志雲同親密戰友王喜步出法庭時，即刻走路有風！陳總去到呢兩日嘅開餐、休息根據地香格里拉酒店嗰陣，仲忍唔住開心偷笑㖭。不過世事多變，大家欲知後事如何，真係要同媽咪姐一齊睇埋下回分解嘞！
年年都有……王喜！
由前年開庭，到今年審完再審，王喜一直伴隨陳總左右，開路開到熟，堪稱「大護法」！今年 3月陳志雲空降商台，王喜就喺上個月開咪做主持。終於有回報囉！
聽審原來無得 FUN！
為咗各位讀者，媽咪姐今次決定入埋法庭聽審！嘩，原來真係好鬼攰，由朝早 10點審到下午 4點半，中間有個半鐘放飯，而上下午嘅聆訊期間各有 15分鐘小休。平時睇法庭戲，見啲律師窒嚟窒去好好睇，但事實係辯方律師今次講志雲大師嘅心態都講咗成兩個鐘！媽咪姐差啲瞓著，惟有偷望嚇陳總，提嚇神。嗱，大人物如佢都有閉目養神呀，反而坐佢旁邊嘅王喜真係聽足全程，仲好貼心咁問陳總食唔食喉糖㖭！（其實庭內嚴禁飲食）不過志雲大師婉拒咗，但有啲人竟然喺庭內玩 whatsapp同打機，仲電話響喎。嗱，咁係唔啱嘅，大家若有機會去聽審，記得尊重人尊重自己嘞！
.[忽然1周]官司押後判 陳志雲有番笑容
http://hk8news-e.blogspot.com/2012/11/1_2422.html
