滾熱辣
全民選視帝 惡鬥票王林峯 黎耀祥加簽兩年換獎
2012年11月09日
台慶頒獎禮下月殺到，視帝視後戰如箭在弦。今年視帝之爭尤其激烈，一直飲恨視帝寶座多年的無綫親生仔林峯，終憑《雷霆掃毒》突圍。不過一山還有一山高，剛播的《大太監》首集高開 33點，兩屆視帝黎耀祥緊貼追上。
視帝一戰，估計是黎耀祥與林峯之爭。無綫唔死心，今年台慶頒獎禮再玩「全民投票」，造就 fans超多的林峯被睇高一線。剛滿約無綫的黎耀祥亦不會坐以待斃，於此敏感時期加簽兩年部頭約定無綫，難怪他信心十足說：「獎邊有得讓㗎！我知無綫睇好我！」
獎項從來冇人嫌多，已屬兩屆視帝的黎耀祥，於剛播出的台慶劇《大太監》中，以近似柴九的圓熟演技，演活李連英於清宮未紅前的辛酸，獲得觀眾認同。劇集的結局篇，正是台慶頒獎禮舉行之時， timing食到正，視帝寶座幾乎唾手可得。他說：「我都攞過兩次，但如果真係再攞到，咁就開心過中六合彩喇！」
造就林峯攞獎
不過黎耀祥奪獎之路並非他想像中平坦。事關今年台慶頒獎禮大改遊戲規則，並非如往年一樣由內部高層欽選，而沿襲今年港姐的「失敗」一人一票投選機制。既然觀眾有得揀， fans人多勢眾的林峯，自然勝算較大。知情人士說：「呢個玩法睇落公平，但一眼就知無綫根本就想用呢個方法令林峯當選。」
其實即使內部欽點林峯攞視帝亦不無道理，皆因他在《雷霆掃毒》中的表現的確不俗，動作場面又親自上陣，可惜《雷》劇結局犯駁，被網民狂轟，拖累林峯選戰前失勢。對於攞獎信心，林峯說：「如果可以攞獎，當然開心啦！但我拍嗰陣從來冇諗過係咪用嚟爭視帝。不過我班 fans都會投票撐我。」
視帝前瞻
據知無綫已經擬定今屆視帝候選名單，除黎耀祥和林峯外，還有以下四位候選人俾市民投票。不過觀乎形勢，以下四位似乎陪跑居多。
陳豪 冇戲勢
《天梯》中的陳豪演技未算驚喜，勝在老妝搭夠，加上他近年專注與陳茵媺拍拖兼開咖啡店，冇曬戲勢啦！
劉松仁 黑馬
擁有神級演技的劉松仁，於《名媛望族》周旋五個女人中，表現恰到好處，被喻為黑馬。不過松哥是英皇旗下，攞獎機會渺茫。他說：「人怕出名豬怕肥，我淨係享受做戲，其他嘢唔諗！」
鄭嘉穎 分豬肉
上屆視帝鄭嘉穎，今年憑《怒火街頭 2》 law霸一角入圍，演繹熟口熟面。加上他將重心投放內地，攞豬肉獎「微博人氣大獎」就最啱數。
馬國明 錯 timing
上位小生馬國明憑《 On Call 36小時》人氣急升，可惜劇集年初播出， timing完全錯曬，難怪他說：「個劇播咗咁耐，觀眾嘅熱情冇曬啦，我平常心看待，冇獎冇所謂。」
黎耀祥講掂數
林峯開到口要獎，黎耀祥即使演技有幾爐火純青，也難敵票王林峯。但你有張良計，我有過牆梯，據知剛約滿無綫的黎耀祥，早前就加簽兩年部頭約，以誠意向無綫表明絕無離心。知情人士說：「其實無綫不嬲想簽祥仔做親生仔，但祥仔堅持經理人由佢老婆擔任，所以一直同無綫維持部頭合作形式。不過祥仔勤力過好多無綫親生仔，呢兩年已幫無綫拍咗幾套劇。所以祥仔肯續多兩年，無綫自然識做！」
據知黎耀祥續約並非冇條件，他曾抱怨無綫唔肯放期讓他拍內地劇搵真銀，因此傾約時已講掂數，幫無綫多拍兩套劇後，便返內地逗留八至十個月銀。對此黎耀祥直認不諱，他說：「以前一劇接一劇，想出去搵錢都好難夾到時間，之前我拍落嗰啲，睇怕都夠存貨播映喇啩！」
與無綫傾掂數，黎耀祥對爭視帝充滿信心，他說：「嘩！獎項嘅嘢冇得讓㗎！我知無綫有好多人睇好我，我一啲壓力都冇。不過阿峯表現都好好。」據知黎耀祥和林峯勢必瓜分視帝和「我最喜愛電視男角色」兩獎，其他小生唔恨得咁多。
無綫今年破天荒搞一人一票選港姐，更送房車提高票源，可惜電腦未能支援，令民選失敗收場。發起人兼無綫綜藝科總監餘詠珊，坦言汲取教訓，決心令今屆視帝視後是民意所依歸。
四年拍 331集劇
09年憑《巾幗梟雄》榮升視帝的黎耀祥，可謂任勞任怨，加上無綫正值小生荒，計埋年底和明年二月開拍的兩套新劇，四年間就拍了 331集劇，終年無休，難怪他呻冇得搵真銀。
下周劇情搶先睇
台慶劇《大太監》本周開播已好評如潮。黎耀祥飾演的李連英，頭幾集只屬紫禁城內一個毫無勢力的閹人。不過下周劇情開始進入高潮，黎開始躋身米雪左右，漸漸成為後宮中的「大太監」。
15/11第 10集 慈禧踩單車
原本一直抗拒與好友曹永廉一同侍候米雪的黎耀祥，奉旨入長春宮後，開始與西太後建立起緊密的主僕情誼。
16/11第 11集 邵美琪大反擊
米雪和邵美琪表面相處融洽，但暗地裏卻恨不得對方死。邵美琪恨心中所愛六皇爺張國強情傾慈禧，於是向天發誓自己要做真正高高在上的太後，鬥垮米雪。
14/11第 9集 小皇帝險死
米雪對小皇帝管教甚嚴，搞到小皇帝寧願黐邵美琪。小皇帝頂唔順米雪，學人玩離家出走，於是玩出禍。
12/11第 7集 曹永廉被擒
身為太監本應無情無慾，但飾演慈禧近身太監安德海的曹永廉，將會與飾演妓女的蔣家旻發展一段為世不容的感情。
.[忽然1周]全民選視帝 惡鬥票王林峯 黎耀祥加簽兩年換獎
http://hk8news-e.blogspot.com/2012/11/1_9.html
