2012年10月9日星期二

鄺美雲樓神男友曝光

鄺美雲樓神男友曝光

樓神男友入香閨Cally：開心就得

鄺美雲（Cally）自從與呂良偉分手後，感情生活似是一片空白，只寄情珠寶生意及愛犬Cash和Euro身上，原來美人的生活靜靜泛起漣漪，她昨日承認與恒基兆業地產營業部總經理林達民蜜運兩個月，愛得公開，兩人慢慢堆積情感，暫未想到要結婚。

現年49歲的鄺美雲自從97年與呂良偉分手後，只有零星緋聞，感情似沒著落，她因而全心推廣佛教、做慈善工作及自己的珠寶生意，近月寂寞的心終有人撫慰！

最近Cally被讀者爆料指她與恒基兆業地產營業部總經理林達民（Thomas）拍拖，兩人幾個月來經常出雙入對，有人更目擊男方到訪鄺美雲的香閨，鄺美雲昨日在自己位於中環的珠寶店接受記者訪問，大方承認戀情，但炮轟有報道指林達民是已婚之說，強調男友已經離婚，現屬單身。

「追咗唔係好耐」

其實Cally大前晚（6日）已與男友一同在灣仔出席演藝學院的周年籌款晚會，並向朋友公開男友身份，有了愛情滋潤的她，昨日竟穿起熱褲在店內接受本報訪問，還不時流露甜蜜笑容。談到拍拖多久，Cally說：「拍拖兩個月，都冇隱瞞，好多朋友都見過佢。」公開是否給男友派定心丸？她說：「都係啦，家我唔係出唱片拍戲，冇需要無端端講出嚟。」

Cally已有多年沒有拍拖，她笑言耐到連自己都記不起，那麼今次林達民如何及花了多少時間才將她追到手？她笑說：「追咗唔係好耐，幾個月啦，呢啲互相……哎呀唔識講，拍拖梗係開心至拍拖，見完一次開心至想見第二次。」Cally坦言跟男友啱傾，又欣賞他有智慧又聰明。

至於男友曾結婚及有子女的背景，Cally強調必須搞清楚，她說：「婚姻狀況一定要搞清楚，否則好麻煩，我點會介意佢有小朋友呢？年紀唔係細，有呢啲人生經驗好正常，我都有Cash同Euro啦！」愛犬Cash與Euro可有呷醋咬林達民？Cally笑言：「佢哋好鍾意佢，冇呷醋，啲狗好識嘢嘅！」

強調男友已離婚

至於有指林達民曾夜訪香閨，Cally謂已認定對方是真命天子，但與夜訪香閨無關，她說：「好多朋友、記者都夜訪我香閨啦，男女朋友夜訪香閨有乜嘢問題，開心就得，我大個女，同男友有冇拖手唔使交代。」有否想到結婚？她冧笑道：「剛剛拍拖啫，未諗到咁快、咁遠。」Cally也不擔心公開戀情令男友有壓力。

對於有報道指其男友已婚，暗示她做小三，Cally感到氣憤，她說：「噚日有人打嚟問，因忙緊只叫聽日講，但結果出嚟好似避忌咁，我冇嘢要隱瞞，好多朋友見過。佢係已離婚，覺得有人設圈套我踩，可以光明正大問我佢婚姻狀況係點，我會答。」

拍拖一齊做運動

此外，Cally昨日接受商台節目《1圈圈》電話訪問，也緊張地澄清男友其實已經離婚，更謂與律師商量擬向失實報道作出追究，她說：「拍拖係開心事，要見就見，冇嘢要收埋。」Cally坦言與男友很有默契，又會跟他做運動。

採訪：溫敏芝、馬建華

攝影：陳順禎

人物誌：恒基高層人脈廣

與鄺美雲（Cally）戀上的林達民，現年五十餘歲，據Cally稱他已離婚。林達民是恒基兆業地產營業部總經理，83年已加入該公司，具有超過28年物業銷售策劃經驗，在業界享負盛名。他持有澳洲悉尼科技大學工程管理學碩士學位及香港理工大學管理學文憑，現時為香港地產行政師學會普通會員以及香港市務學會行政人員會士，人脈極廣。近年林達民經常見報，在恒基的發佈會中，多數有他的影子。