2011年12月7日 星期三

[東週刊][政官莊]「溫情故事」受質疑 梁媽媽紥腳之謎


振英哥於造勢大會大打「溫情牌」,說自己細路時,與紥腳媽媽抬幾十磅膠花,行二十幾分鐘交回山寨廠,講到呢個催淚位就眼濕濕,好有戲劇效果。佢老哥對外界反應計算曬,但估唔到係,阿媽紥腳竟然引來種種質疑。


質疑一:振英哥阿媽出生於民國建立之後,當時政府已明令禁止紥腳,照咁睇,梁媽媽對腳無理由仲要被紥吖!


他見到阿媽紥腳被人質疑,即刻出嚟解畫,說阿媽生他時已近四十歲,依此計算,她年紀有成九十幾歲,出世時民國建立不久,仍遺留紥腳惡習。如此解釋卻又引來另一疑問,在那個年代,女人好少成四十歲仍生仔,可以說是超級高齡產婦,有啲奇怪。





梁媽媽舊相露出兩隻正常腳趾,有人質疑她是否紥腳。



質疑二:有心水清人士睇過梁媽媽張相,發現她有兩隻正常腳趾,按理紥腳婦女成隻腳變曬形,腳趾全部嚴重內屈,唔會咁大。振英哥聽到有人咁講,隨即鄭重澄清,說媽媽紥腳方法比較特別,只紥咗中趾至尾趾三隻腳趾,腳趾公同第二隻腳趾就冇紥。


本刊翻查資料,正宗紥腳方法是紥四隻腳趾,僅留趾公,由幼兒時開始,分階段以布條緊纏令腳骨變形,成為尖狀的小腳。從文獻睇,似乎未見過梁媽媽的「三趾紥法」,究竟係咪正宗紥腳,要問佢阿媽至知。


記者攞住張相去問一位跌打醫師,他說從相片可清楚看到梁媽媽的腳趾公及第二隻腳趾,並隱約看到第三隻腳趾,他未見過真的紥腳,但從網上圖片所見,舊時紥腳婦女的腳都有一共通點,都是腳形呈尖狀並且向外側翻,梁母的腳則是較偏向內側翻。


近排他引起的話題多多,令他忙於解畫拆招,但阿媽紥腳都受爭議,應非他始料所及。