2011年10月20日 星期四

[壹週刊.直接睇]無綫包薪50萬 陳展鵬3個月跑夠數




探熱針
電視圈大戰,無綫台前幕後成為城市挖角目標,今年中在電視劇《真相》首次做男主角,忽然跑出的陳展鵬,八月改簽無綫經理人合約,挖角潮無佢份,唯有疊埋心水做好自己份工。簽新約三個月,話咁快賺夠包薪價五十萬,其餘收入袋袋平安。留守無綫,一樣大把世界!
三個月達標

三十四歲的陳展鵬(煎Pang)效力亞視六年後,○八年轉投無綫,今年六月終憑電視劇《真相》彈出,升格做小生並獲公司力捧,在新劇《ATF反恐》再做第一男主角,又得監製王心慰大幅加戲份,連吳卓羲都要借歪。月前,無綫與他改簽八年包薪經理人合約,年薪五十萬。人氣升,陳展鵬工作不絕,廣告、登台、活動,甚至是保險講座等不同類型的工作,大小通殺,兩個多月來,接了近二十個jobs;未計拍劇及其他無綫節目,「出show」收入,已有五十萬,唔使三個月跑夠包薪目標,往後再接jobs,逐單計淨袋。
密食當三番

九月拍完《ATF反恐》後,陳展鵬全身投入搵真銀,屋邨酒樓演出、商場活動、幫旅行團做騷、講座、短期廣告乜都接,三個月進賬五十萬。
Fans爭住嘴

「好多jobs係《真相》帶挈俾我嘅,例如保險講座,佢哋覺得我律師形像夠深刻,你哋(指記者)又話我入行十七年鹹魚翻生,經歷夠所以搵我講talk。至於Alainmikli個眼鏡廣告,就因為我戴咗佢哋牌子眼鏡拍劇,出街之後,好多人打電話去問,所以個客索性搵我拍埋廣告。」陳展鵬說。留守無綫一樣有運行,陳展鵬上週三(十月十二日),幫契姐李麗霞做完「黑妹演唱會」表演嘉賓,即晚出發澳洲墨爾本做華裔小姐嘉賓;緊接着還有澳門、珠海、馬來西亞及溫哥華各地演出,馬不停蹄。「黑妹演唱會」當晚,大會為了配合陳展鵬飛澳洲的航班時間,安排他打頭陣出場,在台上獻唱《真相》主題曲《潛伏》及張學友的《怎麼捨得你》等,又與契姐黑妹手拖手合唱《明天你是否依然愛我》,其間大班女fans爭到台邊給他利是,又攬又嘴,陳展鵬有求必應。
三劇在手

晚上九時許,陳展鵬在經理人陪同下趕到機場,趕乘當晚十一時起飛的飛機到墨爾本,瘋狂fans飛的(士)跟入機場送機,係威係勢。十二月,陳展鵬將要投入與黎耀祥、張可頤合作的重頭劇《大太監》的拍攝工作,再接黃宗澤及陳茵媺有份的古裝劇《酉陽雜俎》,加埋已拍完的《ATF反恐》,陳展鵬三劇在手,未來一年,大有機會再上一層樓! ####


陳展鵬幫契姐黑妹演唱會做嘉賓,fans湧到台邊送花要求抱抱。


做過歌星,彈結他有一手,無綫準備鋪路幫陳展鵬再戰樂壇。


同契姐黑妹○六年拍亞視劇《靈舍不同》認識,契姊弟合唱,fans派紅包。


訪問期間,擔心陳展鵬無時間食飯的陳母(小圖),不時上前催促兒子。


陳展鵬在台慶劇《法證先鋒Ⅲ》飾演女主角張可頤男友,雖屬客串,卻也重點宣傳。



晚上十時許,陳展鵬與經理人到機場check-in,出發去墨爾本做華裔小姐嘉賓。



練得一身肌肉的陳打開心口,與黃宗澤及陳茵媺拍攝新劇《酉陽雜俎》造型照。


與李司棋及吳卓羲等拍新劇《ATF反恐》,吳卓羲fans曾因陳展鵬戲份多過「唱K」,四出投訴。

1128期