巡禮眾生相之妝外風雲 MW,

2013年11月15日星期五

無綫每年嘅節目巡禮，係一班小生花旦出盡招數幫公司冧客爭生意時候，人人都好認真晨早返去化妝、 set頭、背稿，上到台以靚靚姿態為客戶做布景板。但華麗背後呢？嘩！嘩！嘩！

受無綫力捧只係好短日子嘅翠如 BB，喺高登網民心目中得到好高評價。但若然見到佢呢個粉底搽到一撻撻嘅白面嚇人妝，高登嘅朋友，要唔要停一停、諗一諗呢？

有祖藍喺度，先發現原來男人唔化妝都可以好恐怖。素顏嘅祖藍，暗瘡原來何其多，同化妝後真係大有分別。睇睇吓，比黃光亮本人更似黃光亮。

早排宣布同神秘「港男」又甩拖嘅胡杏兒，無愛情滋潤，確實 dry咗啲！佢雖然早有準備大黑超，但仍然遮掩唔到面青兼唇白。好在喺閃光燈下嘅黑色針織衫，唔覺意透到白色 bra bra， so sexy！

近年多咗北上搵人仔嘅林峯，話曬係親生仔喎！當然要返香港幫公司做巡禮。一早返咗嚟冇咩做，林公子自己上 canteen嘆茶。不過媽咪姐發現，其間佢除咗掛住同千語 BB WhatsApp外，仲係「廁紙大魔王」，紙巾搞到一枱都係，公子果然冇乜環保意識。

之後，林峯又孖傳過緋聞嘅佘詩曼（右二）、堂妹林夏薇（左二）同化妝師再戰 canteen，大家可能太耐冇見，開飯前佢哋先玩一輪自拍，十足自由行。用餐時，姣佘照舊使出電眼本領，林峯雖然心有 BB，但中招在所難免。

多年來，都有報道話朱慧敏犯眾憎，唔係得罪演員，就辣「㷫」高層。不過巡禮呢晚，媽咪姐見助理總經理區偉林主動同佢握手，又親自揸機幫佢同客戶影相，傳聞嘅嘢，假的真不了！