2013年3月20日 星期三

FACE 304 本地娛樂 拋夫養子  BIGBANG緋聞女收埋 3歲仔 久保杏奈:勝利都知




真面目

拋夫養子  BIGBANG緋聞女收埋 3歲仔 久保杏奈:勝利都知

日模雙妹嘜田代麻衣同久保杏奈( Anna)上週被影到由黃浩帶領,於酒店夜場招呼兩位猛男,久保更隨即被踢爆,跟曾效力 J.League勁旅仙台維加泰的日本足球員一柳夢吾結過婚兼育有一子,被指隱瞞媽模身份,來港搵食兼溝仔。

曾被影到於街頭啜爆 BIGBANG靚仔成員勝利,又陪過房祖名夜蒲,星級男友名單多到數唔曬的 Anna接受本刊訪問,首次披露自己的確是單親媽咪。提起 3歲大囝囝, Anna更激動喊到收唔到掣,強調一直冇隱瞞有個仔,「勝利同 Jaycee(房祖名)都知。」外表 open的 Anna,原來都係獨力養仔的單親媽咪。

現年 27歲的久保杏奈,前年從日本來港發展後,拍過唔少廣告,更加入王友良旗下的日韓模女團「 Girls Kingdom」又唱又跳踩入歌壇。可惜兩年來知名度一般,反而因她不時跟紅星傳緋聞,好似房祖名及 BIGBANG勝利等,令她有唔少見報機會。

《蘋果日報》圖片

上年 9月, BIGBANG的靚仔成員勝利來港拍日劇《金田一少年事件簿》期間,曾同 Anna去灣仔唱 K,當晚飲多兩杯嘅 Anna,唱完 K截的士時,主動攬住勝利啜面。但 Anna強調同勝利只係朋友,勝利更知道佢有細路仔。

Anna囝囝已經 3歲大,原本叫一柳英夢,但同前夫一柳夢吾離婚後,就幫個仔改姓叫久保英夢,跟番自已姓。

生咗仔後, Anna同前夫及囝囝亦曾影合家歡相留念,但 Anna強調同前夫離婚後,已沒有聯絡,兒子亦大約每年見生父一次。

網上圖片

5年前,當時 22歲嘅 Anna跟日本足球員一柳夢吾奉子成婚。當時兩人喺婚禮中,都笑得好開心。而現年 27歲嘅一柳(小圖),曾效力甲組勁旅仙台維加泰,但因表現麻麻,今年要降班踢乙組球會。

前夫偷食離婚

形象 open兼喜愛夜蒲的 Anna,人人以為係單身索女,點知最近竟被日本網友踢爆來港發展前,曾與日本職業足球員一柳夢吾結婚,並育有一個 3歲大的兒子久保英夢,但 Anna同一柳夢吾早於 2010年離婚。週日( 17日), Anna接受本刊訪問,強調冇心隱瞞:「其實一直冇記者問過我,所以我冇講出嚟。我哋(跟一柳)係經朋友介紹認識之後拍拖,冇耐我有咗 BB,當時我唔理父母反對都同佢(一柳夢吾)結婚,點知佢趁我懷孕時出去偷食,我真係好傷心,生完仔之後我決定同佢離婚。」

提起前夫把幾火,但被問到獨自來港發展後,囝囝由誰照顧時, Anna即喊到收唔到聲:「𠵱家由我媽咪,喺九州幫我照顧囝囝。離婚後,我曾經因為要同前夫嘅父母爭個仔嘅撫養權搞到日日喊。為咗令前夫唔好同我爭,我決定唔使佢畀贍養費。我當時喺日本工作唔多,好彩 Ivan(王友良)知我要養仔,引薦我嚟香港做模特兒搵錢。來港初時都因為掛住個仔掛到成日喊,試過上年個仔兩歲生日,我因工作返唔到日本同佢慶祝,真係好難過!」

17/3情侶裝會新歡

週日( 17日)中午, Anna就傍住牙醫男友唐逸謙( Clement)去跑馬地打曲棍球,當日 2人齊齊着住粉紅色衫到場,襯到絕。

場外打氣

當男友在場內比賽時, Anna就企喺場外隔住鐵絲網同男友打氣,幸福滿瀉。 2人相識超過 1年,但拍拖只係幾個月,所以依然係熱戀期。

圖片

上年中, Anna多次被影到同龍之子房祖名夜蒲,繼而傳出 2人撻着。但 Anna死口唔認,只強調同房祖名係朋友。

開埋車門

當日 Clement就揸住價值 67萬的 Benz載 Anna去北角海逸君綽酒店食飯,更幫 Anna開埋車門,勁有風度。

返日本湊仔?

前年來港發展的久保杏奈,主要工作為日韓女子組合 Girls Kingdom宣傳及拍廣告,最近就有獅王納米樂洗衣液及麥當勞廣告出街。不過隨着囝囝入學, Anna今年會抽一半時間留喺日本照顧囝囝及跟幾位朋友夾份代理日本清酒,唔排除會淡出 Girls Kingdom。王友良就話:「工作上基本冇乜影響,暫時未退出 Girls Kingdom。」

最近 Anna嘅獅王納米樂洗衣液廣告亦已出街,廣告中 Anna形象賢淑。

加入 Girls Kingdom只短短一年半,王友良話已接咗不少商場騷, Anna暫時仍係 Girls Kingdom成員。

箍實靚仔牙醫

現年 23歲嘅媽模 Mia(陳靜儀),好似 Anna一樣曾經離婚,育有 1仔 1女嘅佢為賺錢養家,亦唔介意拍性感寫真。

Anna來港後,經常被人影到同房祖名及 BIGBANG的勝利夜蒲相,問到這些負面新聞會否對囝囝造成負面影響, Anna承認:「真係唔係幾好,不過 Jaycee(房祖名)同勝利同我只係朋友……勝利係我一個日本朋友嘅朋友,而我個日本朋友有同勝利講過我有個仔嘅事,所以佢哋知我有個仔。」

Anna最近終於搵到真命天子。週日上午,本刊發現 Anna離開上環屋企後單拖去跑馬地睇曲棍球比賽,原來當日佢嘅新男友,任職牙醫的 Clement有份比賽。賽後,男方更攬實 Anna調情。

本週一,記者致電王友良,他說一早知 Anna有個仔,「我知,我覺得私人嘢冇乜需要刻意講。其實好多日本藝人、 model都係單親媽咪,唔係一件大不了嘅事。」

採訪、撰文:何家文

攝影:攝影組


.FACE 304 本地娛樂 拋夫養子  BIGBANG緋聞女收埋 3歲仔 久保杏奈:勝利都知
http://veryy8.blogspot.com/2013/03/face-304-bigbang-3-face.html
.FACE 304 本地娛樂 拋夫養子  BIGBANG緋聞女收埋 3歲仔 久保杏奈:勝利都知
http://veryy8.blogspot.com/2013/03/face-304-bigbang-3-face.html