2013年3月31日 星期日

李亞男情歸長笛 學結他自彈自唱冧王祖藍

李亞男情歸長笛


李亞男情歸長笛 學結他自彈自唱冧王祖藍

      

為了將李亞男打造成“完美女神”,李媽媽自她五歲開始已要她學鋼琴,雖然最終因鋼琴老師太凶狠令她半途而廢,但亞男還是成功開發了音樂才藝,無論長笛或結他都“駕馭”得頭頭是道,參選溫哥華華裔小姐時更以吹奏長笛作才藝表演。

李亞男(Leanne)除溫文爾雅的態度令人目眩神迷外,其音樂才華亦令人為之佩服。由於李媽媽想將她打造成“完美女神”,Leanne五歲開始已苦練鋼琴:“我學到八、九歲就冇學喇!所以已經唔系好記得點彈。𠮶時個鋼琴老師好惡,成日打我,只要我一唔啱音或者彈錯咗,佢就會成把間尺打落我啲手指度,你知啦,對咁細個小朋友會有童年陰影o架嘛!不過我好乖o架,就算畀老師打我都忍住唔敢出聲,因為我覺得媽咪同婆婆想我學咩就要學咩。好彩我媽咪喺我9歲𠮶陣突然問我:‘囡,你仲想唔想學落去?’我終於等到機會表達自己嘅感受,我就同佢講唔系咁鍾意鋼琴,佢哋亦冇再勉強我喇!”

吹完頭暈

雖然如此,Leanne與音樂的緣分並未因此畫上句號,在加拿大長大及讀書的她,初中時因為學校規定每個人都要學樂器,令她開始接觸長笛(Flute)。問到為何對長笛情有獨鍾,她說:“我覺得拎住長笛吹奏個感覺好靚,本身我有諗過學單簧管,但我唔鍾意啲聲有啲刺耳,長笛嘅音色悅耳優美好多。”不過要駕馭長笛絕非易事,Leanne笑言每次吹奏完定必頭暈:“唔知細個系咪因為少唱歌,丹田氣唔系好夠,每次吹完都覺得好暈,因為冇乜機會抖氣。長笛好得意嘅,通常要先吸一大啖氣,然後一口氣吹好多句,都幾考功力o架。最要注意嘅系唔可以畀人聽到有抖氣聲,否則好肉酸,”

偷雞咪嘴

凡事愛為人著想的Leanne笑言當年與同學一起練習演奏時,每到高音部分便會自動“咪嘴”,因為擔心累街坊:“我系一個超唔鍾意影響到大家嘅人,我唔想因為一粒音搞禍成件事,所以每次合奏去到高音位,我都會吹得特別輕,或者作曬狀好用力咁吹,其實系咪嘴偷咗雞嘅,哈哈!𠮶陣其實成班同學都系柴娃娃,但我好Enjoy𠮶種Teamwork嘅感覺,我覺得出嚟嘅感覺好Professional(專業)。”

Leanne學了一年長笛後再次“荒廢”,時間更達七年之久,直到參選溫哥華華裔小姐前夕,她才回想起闊別多年的“好友”:“嘻嘻,因為選美要才藝表演,我𠮶時又長頭發㖞,覺得吹住長笛,啲頭發同條裙一齊飄飄嚇成件事好靚好加分,所以就揀呢樣嘢嚟表演。”為了重拾演奏技巧,她請老師特訓,短短兩個月已吹奏得似模似樣:“我都覺得自己有啲音樂天分嘅,不過我驚自己唔夠氣,都有狂練o架,每日兩個鍾咁多咯。”自從那次表演後,她重拾對長笛的興趣,偶爾還會挑選它為出騷的伴侶呢!



Leanne坐在草地上吹奏長笛,飄逸美麗。

李亞男情歸長笛

Leanne表示駕馭長笛絕非易事。

李亞男情歸長笛

長笛音色優美,獲不少音樂愛好者垂青。

學結他自彈自唱冧祖藍

除鋼琴和長笛外,Leanne兩、三年前還自學結他,她笑說:“我妹妹每日返學都會抽幾個鍾練結他,雖然佢系自學,但已經去到好高級嘅階段,唔使睇譜都彈到首歌出嚟。我見佢咁叻,咪走去網上學嚇點樣彈囉。因為我鍾意唱歌,所以學彈結他只系一個娛樂,畀自己輕松嚇。”她又指自學彈結他一點也不難:“只要掌握到基本嘅Do Re Mi點彈,已經可以好似模似樣。但有兩個要訣,第一唔可以留指甲,第二系啲手指要用力o架,否則就會走音。不過初初學時覺得啲手指頭好痛,因為要撳到好實。”

Leanne透露曾自彈自唱錄制聖誕歌給男友王祖藍作聖誕禮物,並笑言祖藍收禮後冧到爆:“其實我依家呢個結他都系祖藍送畀我嘅,系我嘅生日禮物。(幾錢一個?)一萬蚊度啦!”她又踢爆祖藍亦曾學彈結他,可惜上了數堂便“半途而廢”:“你知佢忙啦,冇迫切性需要佢都唔會的起心肝學到底。”

李亞男情歸長笛

學結他自彈自唱冧祖藍

李亞男情歸長笛

Leanne初學結他時練到手指頭發痛。

李亞男情歸長笛

祖藍收到Leanne自彈自唱的聖誕歌後開心到彈起。(資料圖片)

愛繪畫驚挨窮

除了樂器,Leanne亦喜歡繪畫,當年在加拿大讀大學時主修繪畫,不過她笑言當年的教學方法十分“自生自滅”:“我主要系學素描同油畫,但其實老師冇特別教任何嘢,通常都系揾個裸體模特兒入嚟,然後叫我哋自由發揮咁畫,技巧要靠畫多啲掌握。老師主要系教我哋點樣表達Concept(概念),而且亦唔需要畫得好靚。”談到素描與油畫的分別,她說:“油畫可以由深畫到淺,畫深咗可以加一筆抹番佢,但素描就唔可以,畫深咗冇得擦咗再嚟過,所以要由淺慢慢畫。”

Leanne透露最滿意的作品是以創意取勝:“我好記得有幅素描,雖然有個模特兒畀我照住畫,但我喺上面憑空想像加咗好多商標,例如加啲Barcode(條碼)落一個人嘅背脊。𠮶幅畫我主要想表達呢個世界好物質,好多人覺得買名牌就代表到身份。”她又指從繪畫風格可以看出一個人的性格:“有啲人好細心嘅,佢啲筆畫會落得好幼細,我就懶型咁,鍾意用粗筆畫去表達,而且我好少畫靚女,反而鍾意畫老人家啲皺紋,因為我覺得皺紋可以代表一個人嘅故事。”

至於為何鍾情畫畫,她說:“我爸爸系設計師,我好崇拜佢。佢畫毛澤東出身嘅,以前就算成四五層樓咁高嘅毛澤東像,我爸爸只要用個架爬上去就可以畫到,我覺得佢好叻。”那麼假若沒有選美,會否選擇畫家作終身職業,她說:“我會做設計師,唔敢做畫家,驚會好窮。”

李亞男情歸長笛

Leanne繪畫靠創意取勝,表達手法自成一格。

李亞男情歸長笛



.李亞男情歸長笛 學結他自彈自唱冧王祖藍
http://veryy8.blogspot.com/2013/03/blog-post_9965.html
.李亞男情歸長笛 學結他自彈自唱冧王祖藍
http://veryy8.blogspot.com/2013/03/blog-post_9965.html