2013年3月13日星期三

男友沈柏淳求婚 31歲胡定欣年尾結婚

FACE週刊第303期

上年尾攞咗 TVB頒獎禮「最佳女配角」嘅胡定欣，事業大直路，可惜情路就勁多波折，先被吳浩康撇甩，之後同男神馬明又冇好結果，好彩終於泊到好碼頭，釣到廣告界才俊 Patt（沈柏淳）。

定欣同 Patt拍拖差唔多半年，不時被人影到孖公仔一齊拍拖，最近佢仲唔客氣搬埋去渣甸山同男友同居，一於落重注。

FBI仲收到風， Patt早喺兩個月前已經向定欣求婚，之前放曬風話恨嫁嘅胡定欣當然（舌累）飯應，雖然婚期仍然未定，但好可能係今年內拉埋天窗，而定欣仲一早將呢件事通知好姊妹胡杏兒。如無意外，杏兒都應該做硬伴娘喇。

31歲胡定欣同 36歲男友 Patt外形同年齡好襯，二人已經見曬家長。 FBI聽聞胡定欣已搬離將軍澳舊居同 Patt喺渣甸山同居，部署一切等入宮。

胡定欣同 Patt就嚟結婚，之前同胡定欣糾纏超過 3年嘅馬國明，最近傳出暗撻契妹唐詩詠，唐更陪馬明一齊過生日。上星期二人孖住出席活動亦拖曬手，馬明話：「傳多啲緋聞冇所謂，最緊要唔好咁難聽就得！」

胡定欣同胡杏兒上年一齊去歐洲拍《衝上雲霄 II》時成為好姊妹，據知 Patt向胡定欣求婚後，定欣第一時間通知胡杏兒。睇嚇胡定欣喺《衝 II》著婚紗相嘅笑容幾咁幸福，就知佢恨嫁啦！

雖然已名花有主，但定欣仲係一副戰鬥格，上週一（ 4日）播出嘅《戀愛季節》中，定欣為挽救同唯唯嘅婚姻，不惜出動低 V晚裝，露 3吋長事業線色誘，引起網友熱烈討論，但相信佢結咗婚後應該唔會咁搏喇！

定欣雖然忙到死，但週日（ 10日）竟留喺屋企自己煮 brunch，擺明學定做煮飯婆。