黃金視窗：黃光亮王祖藍 父子情未了
以前流傳過黃光亮與王祖藍有血緣關係，但因黃光亮拋妻棄子，遭王祖藍堅決拒認。當年祖藍曾戲言父親在天堂也嚇到彈番起身，但礙於他與黃光亮同樣有大鼻子，五官及聲線亦有九成相似，傳聞一直繼續流傳，黃光亮與祖藍終於在無綫劇《老表，你好嘢！》中父子相認，輕易成為戲中一個亮點。
撰文：何慧斯
■黃光亮和王祖藍戲內戲外都儼如父子，老竇一聲號令走入廁所影相，阿仔當然盡力配合。
攝影：陳慧安
造型：Dicky of baraka（王祖藍）
早年盛傳在電影圈有「四大惡人」之稱的黃光亮，與王祖藍有血緣關係，李香琴試過在化妝間問祖藍父親近況，祖藍表示父親已過身，琴姐很大反應追問黃光亮已經死了？重提當年笑話，祖藍哈哈大笑地說：「有時煲啲古仔都幾有用呀！」《老表》蔡總上身的黃光亮亦說：「當年有老婆啲親戚都打嚟，話乜周刊都賣緊喎，又叫我千祈咪畀我老婆睇喎！我咪叫佢哋死喇！」
哎吔仔好戲抵讚
訪問期間，哎吔父子黃光亮和祖藍的默契絕不遜色於任何一對真父子，兩仔爺一句接一句談論劇情，擺甫士只需要望一望對方，要溫馨有溫馨，要搞笑有搞笑，黃光亮還說：「個死仔扮我後生嗰陣，嗰啲神情真係好似，有一場戲我想學佢都做唔到，但係我點樣行佢都即刻做到。我仲同個死仔拍咗幾場喺床上傾偈嘅戲，拆佈景嗰陣都忍唔住走去望一望張床，諗番拍嗰陣係幾過癮，呢啲回憶未試過，好似真係做咗佢個老竇。」
■黃光亮當年在《監獄風雲》中的角色儍標，至今仍為人津津樂道。劇照
■鏡頭前的黃光亮經常惡形惡相示人，難怪被號稱為四大惡人。
《天若有情》劇照
沒有《監獄風雲》的儍標、《天若有情》的喇叭，黃光亮在《老表》中飾演的蔡總，只有恤衫西褲的造型，假如你細心發現，黃光亮任何時刻都會夾著一個皮包，原來皮包背後是經過精心設計，黃光亮說：「終於有人留意到，當初好強烈反對呢個造型，有要求過改，但係最後唔成功，所以咪惟有改自己。點知有一次我唔覺意擺低咗個袋，即刻發覺蔡一潔（劇中角色）走咗，感覺變番做黃光亮，但係之後夾番住個袋，就即刻蔡一潔上身，本來仲有煙仔餅，但係試過幾次個效果唔係好好，所以咪冇用。」
■黃光亮和祖藍一舉手一投足默契十足，他們笑稱多得傳媒，才造就《老表》這故事。
自度造型省招牌
在旁的祖藍當然讚不絕口，他說：「呢個袋係佢自己設計，劇本完全冇，比當初預期好好多，好多人話今次係打破咗TVB一啲嘢，佢就係其中一樣，打破咗個典型嘅演技。」
問到會否繼續重出江湖，黃光亮說：「有人搵咪拍囉，不過真係好揀擇，要有好劇本同拍檔，如果出嚟hea嚇，無端端整個做儍標咁嗌幾句、殺佢，咁就唔好喇，我多多錢都唔會拍。」祖藍更預告結局將有一幕向經典致敬，莫非儍標重出江湖？
重燃演藝深情
■黃光亮自覺只是演藝圈的過客，最終因意興闌珊而淡出娛樂圈。資料圖片
黃光亮拍過近百部電影，飾演過不同角色，最後意興闌珊淡出娛樂圈，談到過去的拍戲生涯，他說：「以前我直頭冇當過我係演戲，我覺得係一個過客，尤其嗰陣我做演藝人協會，發覺好多人唔係做緊演藝人協會，係娛樂圈協會。」
■左起：朱咪咪、王祖藍和黃光亮走在一起，擦出意想不到的火花。
《老表，你好嘢！》劇照
黃光亮續說：「嗰陣拍極都係嗰啲嘢，啲人做嘢態度又唔專業同唔尊敬，唔係做嘢嘅，我咪覺得得我一個人尊重都冇用。今次呢班讀書人真係好有誠意，睇到個衰仔（王祖藍）場場戲都想散播啲訊息，睇劇本真係睇到起曬雞皮，搞到我落咗好多力，真係歸功我呢幾年睇過300幾套電影，我諗應該可以合格啩。」
.黃金視窗：黃光亮王祖藍 父子情未了
http://veryy8.blogspot.com/2013/01/blog-post_2442.html.黃金視窗：黃光亮王祖藍 父子情未了
http://veryy8.blogspot.com/2013/01/blog-post_2442.html
