封曬塵
07年雙料視帝陳豪，今年憑《點解阿Sir係阿Sir》羅Sir再度提名視帝，角色有noise，但論勢頭始終不及Law霸嘉穎同Laughing天華，連陳豪自己都認今年陪跑。
其實陳豪本來最有信心嗰套係本週播嘅倉底劇《天與地》，劇中陳豪激減50磅做筋肉人，又要食人又要做大奸角，可惜有高層嫌該劇太血腥、題材敏感，搞到大製作要封倉兩年，陳豪要死 先可以安排喺台慶後炮灰檔期出街！難怪陳豪都話：「終於知咩叫樂與怒！」
本週首播嘅兩年前倉底作《天與地》，有陳豪、林保怡和佘詩曼，加埋金牌監製戚其義，絕對係TVB近年罕有皇馬級組合，原本係上年台慶劇，同《義海豪情》、《公主嫁到》等爭過。不過家排喺台慶後嘅本週播放，不計入今年頒獎禮，檔期真係天與地！
驚題材敏感
《天與地》不同一般無綫師奶劇，戲軌新鮮，內容講4個夾band青年，因一次雪山意外，令到4人困喺雪山，最後要食人充飢，之後改變三人命運。題材大膽，加上幾位主角涉及敏感話題，令無綫一眾高層騰曬雞。「其實阿戚（監製戚其義）同珍姐（高層曾勵珍）都覺得正㗎，不過套劇剪好曬，去到更高層度就個個驚，又話夾band觀眾唔buy、食人太血腥，保怡個角色講議員賄選又太敏感，好難call廣告，搞到唔敢上，要變倉底。」知情者說。
「做乖仔太悶」
主角之一嘅陳豪最搏命，為呢套劇激減50磅，每日收工仲喪練結他，為免心血付諸流水，據知曾多次入房搵監製同珍姐傾偈，希望套戲重出生天，卒之被安排在台慶後的炮灰檔期出街，想爭來年視帝極度渺茫。上週四（17日）陳豪出席活動時亦表示：「拍劇唔係為攞獎，我今次角色係大家從未睇過，我唔想再做乖仔，太悶喇！我想帶啲新嘢畀大家。（因為太敏感、血腥，所以咁遲出街喎！）演員只可以做好劇本，其他唔係我控制，套劇有質素，幾時出街都一樣。我有信心觀眾會鍾意。」如果無綫班高層好似你咁諗就好喇！
《天與地》三大封倉原因
金牌監製戚其義，一向鍾意玩創新，唔鍾意拍師奶劇，今次《天與地》玩兄弟情夾雜食人橋段，林保怡喺劇入面飾演賄選議員、陳豪則在劇中飾演黑市期指炒家，更為錢同邵美琪一齊，咁破格搞到班高層淆底。自我審查，唔敢力捧。
雪山食人
劇情講4位band仔，上雪山出席音樂節，之後遇上雪崩被困，更要食同伴充飢，據知拍攝當日的食人場面，劇組用咗大量煙肉同茄汁拍攝。
選舉黑幕
林保怡喺劇中為上位，飾演賄選議員，據知呢個題材嚇窒無綫班高層。
情慾床戲
陳豪今次唔做乖仔，除咗騷肌，仲有場同朱慧敏好激嘅床戲，唔知陳茵媺睇到會唔會嬲呢？
巡禮血腥
08年節目巡禮，有食人手畫面，場面震撼，到09年正式拍攝時，已經將程度減低，冇咁血腥。
少年版跑出
據知無綫高層擔心題材唔啱師奶客，冇信心力穀，但其實劇中4位主角嘅少年版都好搶鏡。
撈埋作曲
劇中以夾band為骨幹，背景音樂唔少band sound，大部分都係由藝員陳建文創作，佢喺北京現代音樂學院畢業，大家記住豎起對耳聽清楚，今次喺劇中飾演酒吧老闆，算係入行以嚟最多戲分嘅一次。
減磅扮大奸
陳豪為今次《天與地》激減50磅，除咗減磅，亦要增肌，冇啖好食之餘，仲要每晚收工練結他，入行以來最辛苦呢套，他說：「監製同我都覺得個角色要有番啲肌肉，於是我足足減咗50磅，早餐食麥皮、夜晚我食菜咋，有時頂唔順先食少少飯，戒油戒糖，一有時間就做gym，就算拍緊嗰陣，有空檔都做掌上壓同sit up ！真係從未試過咁fit！」
####
等咗咁耐終於播。真實對白
大家都想早啲出街！真實對白
終於知咩叫樂與怒。真實對白
《天與地》擺足兩年由台慶劇變倉底，三位主角，陳豪、林保怡和黄德斌上週一(14日)出席宣傳時，亦呻公司太遲出，林保怡仲話：「套劇下年台慶，希望到時TVB可重播番啲片段！」
家輝冇影
《天與地》08年節目巡禮已出現，當時仲搵嚟未做影帝嘅張家輝拍攝，到正式拍攝就變咗黃德斌。
年度推薦？
無綫劇集基本上每套都有冠名贊助，《天與地》咁強卡士竟然冇，只以「年度推薦劇」形容，希望播播吓有啦！
監製戚其義就算擺3年都係戲寶。真實對白
煙肉當人肉
160磅 Fit爆
減咗50磅，仲要有齊胸肌、八嚿朱古力，連陳豪自己都話：「做model嗰陣都冇咁fit！」
210磅
陳豪拍《宮心計》為咗睇起上嚟有威嚴，增肥30磅，拍完即減磅拍《天與地》。
235期《FACE 週刊》
